Vawiin khan Lunglei Saikuti Hall-ah ‘Launching of NLUP Revitalization 2015’ hman a ni a; he hun hi Khuallian Lunglei West Bialtu MLA Pu Chalrosanga Ralte leh Khualzahawm Pu Joseph H.Thanzuala, Member, NAB ten an hmanpui.

NLUP Revitalization 2015 hawnna inkhawm Lunglei Addl DC Pu Rothuama kaihhruaiah Khuallian Pu Chalrosanga Ralte chuan Mizoram hmasawn leh intodelh theih nan sorkar hotuten hmathlir thui tak an neih avangin NLUP hi kalpui zel a ni dawn a, vawiinah NLUP 3rd & 4th Phase hnuaia tanpuina dawng turte tan intuaitharna hun hman a ni thei chu a lawmawm takzet a ni, a ti. NLUP 3rd & 4th Phase beneficiaries ten sorkar atanga malsawmna tangka an dawn tur chu rinawm takin a hmanna tur dik takah an hman a pawimawh a ni, a ti bawk. NLUP Line Department-te thawhrimna leh hnathawh fakin Pu Chalrosanga chuan heng department-a hnathawkte tel lovin NLUP a hlawhtling thei dawn lova, chuvangin theihtawp chhuah zel turin a chah bawk a ni.

Khualzahawm Pu Joseph H.Thanzuala, NAB Member & AMFU President pawhin thusawiin Mizoramin harsatna a tawh lian tak pakhat chu ei leh bara intodelh lohna a ni a, eng ram pawh ei leh bara intodelh lo chu ram changkang a ni ngai lova; chuvangin NLUP ruahmanna fel tak hnuaia tanpuina dawngte chuan intodelh theuh turin tan la theuh ang u, a ti a. 3rd & 4th Phase-a tanpuina dawngturte chu bultan tur an nih avangin training an mamawh a, vawiina an tan ‘Revitalization Programme’ hman theih a ni chu a vanneihthlak hle a. Mipui hian ‘sorkar tha’ kan duh rual rualin sorkar tan ‘mipui tha’ kan ni em tih kan inennawn fo a ngai a ni, a ti bawk.

NLUP Lunglei District Coordinator Pu Zathangliana’n Report-a a tarlan danah chuan Lunglei District huamchhungah NLUP programme chuan Village Council 38, Sub-Village 49 leh Cluster 7 a tuam mek a. 1st Phase-ah chhungkua 7097 leh 2nd Phase-ah chhungkua 7403 te hnenah NLUP tanpuina pek a ni tawh a; 3rd Phase-ah chhungkua 5056 leh 4th Phase-ah chhungkua 2652 te hnenah pek tum a ni bawk.

Vawiina 3rd & 4th Phase hawnna inkhawmah hian ‘Chief Minister’s Special Scheme’ final installmnet Rs.10,000/- chu Khuallian leh Khual Zahawm ten a hnuaia mite hnenah an hlan nghal a ni :

1. Laldingliani, Venglai

2. Lalrinkimi, Venglai

3. Lalramchhunga, Ramthar

4. Z.D.Lalramhluna, Ramthar.