2885/2022-2023 

Aizawl, 30.11.2022: Chief Minister Pu Zoramthanga kaihhruaiin vawiin chawhnu khan CM Office Conference Hall-ah Mizoram Bharat Scouts & Guides State Council Meeting 2022 neih a ni. SYS Minister Pu Robert Romawia Royte pawh a tel a ni.

Chief Minister Pu Zoramthanga, Mizoram Bharat Scouts & Guides President ni bawk chuan thalaite nunkawng hruaithatu atan te, thiam thil tangkai tak tak inzirtirna leh tlawmngaihna nun zirchhuahna atan te Scouts & Guides chu a tangkai thu a sawi a. Thuam inang uniform inbel te hi a mawi mai ni lovin, mahni inthununna (discipline) kenkawhna atan te tha a tih thu a sawi a. Mizo society nen pawh he movement hi inhmeh a tih thu a sawi. Chief Minister chuan Scouts & Guides activities chu tam zawk kalpui zel a nih theih a beisei thu sawiin, sawrkar pawhin a remchang apiangah puih a hrehloh thu a sawi a ni.

Vawiin State Council Meeting-ah hian Aizawla State Headquarters Building sak mamawhna leh a sakna hmun tur chungchang sawiho niin, Search Committee report te ngaihthlak a ni a. Heng bakah bakah hian Rajasthan a January ni 4 leh ni 10 inkara National Jamboree neih tur chungchang sawiho ni bawkin, Mizoram atang tel turte chungchang sawiho a ni bawk.

Vawiin meetingah hian Secretary Pu Lalngilneia Colney chuan February, 2021 atanga November, 20-22 chhunga hmalakna report a pe a. Member thahnem tak an kal a ni.