2886/2022-2023 

Aizawl 30th November 2022: Vawiin khan Phuaibuang Supply Centre-ah Food Civil Supplies & Consumer Affairs Minister Pu K. Lalrinliana chuan Phuaibuang Supply Godown a hawng a, he hunah hian Speaker Pu Lalrinliana Sailo-in a tawiawm a ni.

Khuallian Pu K. Lalrinliana chuan thu sawiin Mizoramah Godown sak that ngai 65 lai awm zinga 21 chu National Bank for Agriculture and Rural Development (NABARD) hnuaia Warehouse Infrastructure Fund (WIF) sum hmangin sawrkarin a sa mek a, Godown bakah Staff Quarters te pawh a theih anga sak nghal zel niin, Mamitah Supply Office pawh sak zawh tawh a ni a ti a. Godown dang 34 te pawh nakum lamah sak that theih ngei a beisei thu a sawi. Supply minster chuan Godown tha tak tak nei mah ila ,enkawlna tha a awm loh chuan rei lohah a chhe leh mai dawn a, chuvangin khawtlang mipuite enkawlna kawngah tan la turin a ngen nghal a ni. Mizo mipuite riltama kan awm lohna turin Mizoram sawrkarin buhfai leh gas-a kan hnianghnarna turin hma a la mek a, chutih rualin kan Godown ah vai buhfai ni lo, Mizo thar chhuah ngei dah thuai a nih theih a beisei thu sawiin, nasa zawka buhfai thar chhuah lama tan la turin kal khawm te chu a sawm nghal a ni.

Minister chuan, Social Media lamah thuthang mak tak tak a awm thu sawiin, mi mal taka inbeihna a tam hle a, thu dik tawk lo han thehdarh mai ching an awm thin a; Social Media hman kawngah fimkhur a ngai hle a, kalkhawm te chu fimkhur taka Social Media hmang turin a ngen bawk a ni.

Speaker leh bialtu MLA  ni bawk Pu Lalrinliana Sailo pawhin thu sawiin, Covid in nasa taka Mizoram a tihbuailai pawha thingtlang kilkhawr ber thlengin Mizoram hmun hrang hrangah Godown tha tak, ei leh bara buai lohna tur atana pawimawh tak hawn theiha a awm zel chu Food Civil Supplies & Consumer Affairs leh a changtu  Minister te hmalakna chak tak a ni a, a lawmawm hle a ni a ti. Godown-a Staff te leh khawtlang mipui ten neitu thinlung pua enkawl hna tha tak leh rinawm taka thawk zel turin  a sawm nghal a ni.

Phuaibuang  Supply Godown hi a dung feet 36, avang feet 27 a zau niin buhfai Quintal 2000 a dah theih a, Godown bakah hian Quarters 2 leh Toilet Block te awm nghalin a vaiin cheng 158,91,007 seng niin, Babie Construction & Consultancy Services ten a sak hna an thawk a ni.

Vawiina Phuaibuang Supply Godown hawnna inkhawm hi Pi. Ramdinliani, Secretary, Food Civil Supplies & Consumer Affairs (FCS&CA) chuan kaihruaiin, Pi Lalhlimpuii Ralte, DCSO Aizawl  East chuan lawmthu sawina a nei a ni.