474/2026-2027

Dated Aizawl, the 11th May, 2026: Vawiin khan Planning & Programme Implementation Conference Hall-ah State Level DISHA Committee (SLDC) Meeting chu an Chairman, Chief Minister Pu Lalduhoma kaihhruainain an thukhawm.

Chief Minister thusawi thenkhatte:

1. Sorkar laipuiin central scheme sum hman dan leh inpek dan kalphung thar SNA-SPARSH a hman tak hnuah Financial Year tawpa Account ti zero thei lo department kan awm avangin harsatna kan tawk a. Khatiang kha awm tawh lo se kan duh a. Kan zain i tang tlang ang u.

2. Central Scheme kalpuitu department-ten thawhho kan thiam a, a remchanna apianga kan inthlunzawm (convergence) hian hmalakna a chak a, kan hlawhpui zawk thin. I uar sauh sauh ang u.

3. Irrigation & Water Resources Department-in kum rei tak chhunga central sorkar rawn release theih loh kan fund te tun hnaiah an hnuk chhuak vek mai a. An chungah lawmthu ka sawi a ni.

4. Central Scheme kan kalpuinaah kan lehkha thehluhte kan umzui chak a ngai a. Sakuh ser nghah zui mai chi a ni lo. Chief Minister DO Letter han thawn a tul changte a awm bawk a. Inthlahrung lovin min rawn hriattir thuai ula, ka lo bawhzui zel ang. Kan MP Pu Richard Vanlalhmangaiha pawh a inhawng em em a ni tih kan hre dawn nia.

5. Department hrang hrangte chungah lawmthu ka sawi a. Kan hmalaknate hi kan ram leh hnam tan a ni tih hre rengin theihtawp i chhuah zel ang u, tih te an ni.

He meeting-ah hian Chief Minister hmalaknaa Mat Multipurpose Dam buaipui mek chu Rs. 274 Crore senna tur project duan fel a nih thu tarlan a ni a. Ruahman danah chuan tuikhuah hi meter 29 a sang, hectare 700 a zau leilet a chawm thei, Power siamna awm, Eco-Tourism kalpui theihna tura duan a ni a. Brahmaputra Board ten a thawhna tur sum an dap zui dawn a ni.

Meeting-ah hian Central Scheme thawk department hrang hrang ten FY 2025-26 a an hmalakna leh an hlawhtlinnate thlirho a ni a. Report a tarlan a nih danin, MGNREGA hnuaiah (household) 62,193 ten ni 100 inhlawhna an thawk a. Central sorkar chuan he scheme hi VB GRAMG tia a thlak dawn avangin a kalpuina tur Mizoram Scheme hi duan fel tawh a ni a. Cabinet Meeting-in a ngaihtuah tura thehluh a ni.

PMAY G 2.0 kalpuina turin Mizoramah survey neih zawh tawh a ni a. Chhungkaw 54,601 te chu he tanpuina dawng thei tura ngaih an ni. PMAY G sum central-in a pek chhuah dan hi Mizoram kalphung nen a inmil tawk lo nia ngaih a ni a. A guideline siam tha tura dil ni se, an ti.

SAGY (Model Village) hmalakna hi engkim thawh zawh tawh a ni a. Khar (Close) tura central sorkarah pawh lehkha thawn tawh niin, SAGY Scheme thar hi a awm tawh dawn lo nia hriat a ni.

AH & Vety hnuaiah Animal Insurance under National Livestock Missions kalpui mek a ni a. Mi 700 velin insurance hi an ti tawh a. Chu chu ti tura beisei zat atanga zaa sawm (10%) vel chauh an ni a. Uar zawka awareness kalpui ni se, an ti.

National Health Missions report atanga a lan danin sorkar kum kalta chhunga nu naupai inziaklut zawng zawng hi 20,137 an ni a. Damdawiina nau nei (Institutional Delivery) hi 17,201 an ni. Nau piang hlim boral hi 285 an awm a, Infant Mortality Rate (IMR) hi 15 a ni a. 16 aia hniama awm hi target mek a ni a, target hi hlen (achieve) a ni.

Planning & Programme Implementation Report-a a lan danin Mizoramah Ministry of Tribal Affairs hnuaia hmasawnna hnathawh pawimawh tak tak 82 a awm mek a, NESIDS (OTRI) hnuaiah project 19, NESIDS (Road) hnuaiah project 11 leh NEC hnuaiah project 48 te kalpui mek an ni. Hengte bakah hian ruahmanna thehluh mek eng emaw zat an awm bawk.

Meeting-ah hian central scheme kalpui department zawng zawngte kum khat chhung hmalakna chipchiar taka endik leh sawiho an ni.

State Level DISHA Committee-ah hian Rural Development Minister Prof. Lalnilawma chu Co-Chairman niin, RD Department Secretary chu Member Secretary a ni a. Member ah MP (Lok Sabha) Pu Richard Vanlalhmangaiha, MP (Rajya Sabha) Pu K. Vanlalvena te bakah, Pu T. Lalhlimpuia, MLA, Lt. Col. Clement Lalhmingthanga, Pi Baryl Vanneihsangi, MLA, Pu K. Laldawngliana, MLA  leh Pu K. Hrahmo, MLA te, Central Scheme kalpuitu department 30 bawr hotute leh mimal leh tlawmngai pawl aiawh ruat bikte an tel a ni.