Chief Minister Pu Lal Thanhawla hoin vawiin khan a cabinet room-ah Finance leh Planning department hotu ten meeting pawimawh tak an nei.

Meeting-ah hian kum 2015-2016 chhunga sorkar sum dinhmun tur thlir hona an nei a. Central sorkarin Planning Commission a tih tawp hnuah, a thlakna tura din NITI Ayaog in kalphung thar tur engmah ruahmanna ala siam loh avangin budget puitling pharh thuah te remchang a awm theih dan tur sawiho a ni a. Kum 2015 - 2016 chhunga project hrang hrang kalpuina tur schemes CSS, NLCPR leh NEC schemes te tan fund awmdan tur hriat ala nih bawk loh avang leh state matching share tur zat te central ministry hrang hrang tena an la duan tur anih bawk avangin sum dinhmun tur meetingah hian  sawiho a ni a. CSS, NEC leh NLCPR atana sum hmuh turte hi department te atanga ruahman thin anih angin, hei hi Finance department in chhut chhuakin, regular Budget tur pawh duan theih beisei anih thu sawiho a ni.

14th Finance Commission atanga sum hmuh tur chhut chungin, kum 2015-16 chhunga sum hmuh theih tur zawng zawng beisei zat chu Rs.5327.72 Crore tih tarlan a ni a. Kal phung thar tur ruahmanna ala awm loh avangin kal dan phung pangngai baka kal ngaihna a awm loh thu sawiho bawk a ni.

Meeting-ah hian Home Minister, Finance Minister, Planning Board Vice Chairman, Parliamentary Secretary (Pu KS Thanga), Chief Secretary, Principal Secretary to Chief Minister, Finance Commissioner te bakah Finance leh Planning department hotu te an tel a ni.