Vawiin khan District Soil & Water Conservation Office, Lunglei-ah NLUP 3rd & 4th Phase, 2nd Installment semna Pu S.Laldingliana, Vice Chairman, HPC Lunglei in a hmanpui.

Pu S.Laldingliana chuan beneficiary-te fuihna thu sawiin NLUP tanpuina sem leh theih a ni hi a lawmawm hle a, mi chanhai leh rahbi tleu tawhte lei rem an rah theihna programme a nih avangin harsatna awm lovin sorkar atangin vawiin ni thlengin pathian zarah sem thei zel a ni, a ti. NLUP hnuaia tanpuina dawngtu ten lawmna chang an hriat a, a hmanna tur dik takah an hman a, tumruhna, taimakna, rinawmna leh tih takzetna nen an thawh zui phawt chuan an ding chhuak ngei ngei ang, a ti bawk. NLUP chu Central sorkar pawhin a thlawp tlat thu leh UNO pawhin tha an tih thu a sawi a, NLUP hmang hian kan ram ngaw chereu zel pawh a siam that ngei beisei a nih thu a sawi bawk.

Vawiin NLUP semnaah hian 2nd installemnt, 3rd Phase ah hian coffee trade, rubber trade leh hmunphiah trade-ah chhungkua 280 hnenah Rs.1,15,98,000/- sem a ni a. 2nd Installment, 4th Phase ah chhungkua 145 hnenah Rs.56,14,200/- sem a ni bawk a ni a. Pu C.Burminghama, Dist.Officer DS&WO, Lunglei-in NLUP hnuaia tanpuina an sem tawh chungchang report a pe a, a chin dan tur dik tak beneficiary-te a hrilhfiah bawk a ni.