Vawiin khan Lunglei District Football Association (LDFA) leh HPC Lunglei tangkawp buatsaih ‘5th HPC Cup Tournament’ chu Thuamluaia Mual, Lunglei-ah hawn a ni a, Khuallian ZENICS Chairman leh Lunglei West Bialtu MLA ni bawk Pu Chalrosanga Ralte-in Tournament hi a hawng a ni.

5th HPC Cup hawnna inkhawm LDFA Sr. Vice-President Pu Jimmy L.Sailo kaihhruaiah Khuallian Pu Chalrosanga Ralte chuan Lunglei-in High Powered Committee a nei hi a vanneihthlak takzet a, hetiang district huapzo tournament ropui tak buatsaih theihna chhan pawh hi Lunglei HPC a awm vang leh sports ngaina tak mi Pu Joseph Lalhimpuia leh Pu S.Laldingliana te HPC Vice-Chairman ah an awm vang a ni, a ti a. Football chu eizawnna tlak a ni tih Mizoten kan hre tawh a, tunah pawh Mizo tlangval 2 te chu India ram aiawhin rampawnah an khel mek a, India Under-14 Team ah pawh Lunglei District-a mi ngei a tel a ni tih tarlangin Pu Chalrosanga chuan taimakna leh tumruhna nen chuan Mizo infiammite chu dinhmun sang tak an thleng thei a ni, a ti. HPC Cup inchuha team chhuak zawng zawng te chu mawi leh thianghlim taka khel theuh turin a chah bawk a ni.

Vawiin HPC Cup hawnnaah hian a tel tur Team 50 te thuchham ‘oath-taking’ chu India International Player Lalrindika Ralte (Didika) in a kaihhruai a, match hmasa ber atan Lunglawn vs. Venghlun team te an khel a ni.