Vawiin khan Chief Minister Pu Lal Thanhawla hoin a office conference room-ah IKEA Workshop on Possible Sourcing of Bamboo Products from Mizoram neih a ni.

IKEA hi inchhung bungrua, home furnishing khawvela siam hnem ber pakhat a ni a. He company hmuchhuaktu Swedish mi Ingvar Kamprad Emtaryd Agunmaryd (IKEA) hmingchawia din a ni a. Thil siamchhuahte hi mau,rua leh changel kawr leh thing tha atanga siam an ni a, mi te ber pawhina a lei ngamna tura man tlawm taka zawrh thin a ni. Tunhma lama industry lian pui pui din thin ang chi ti tawh loin, an duh ang siam thei tur nen partner anga kalin, mamawh tur ang design lam leh a kaihhnawih te chhawp sakin a partnerten a hmanrua mau, rua leh a dangte an lo tum ve thin dawn a ni. Khawvel ram hrang hranga zawrh tur anih avangin a lei turte pawm tlak ngei tur quality sang thei ang bera siam tur a ni. An partnerte siam chhuah pawm tlakte chu an lei let leh thin dawna ni.

Chief Minister Pu Lal Thanhawla chuan mau hman tangkaina ni thin paper mill chu a hlawk loh avangin sorkar chuan din tha a tih loh thu a sawi a. A aia hlawk zawk tur dap chhoh mek anih thu sawiin, tunah IKEA an lo lut dawn ta a, an duhdana kan kal thiam a pawimawh hle dawn a ni a ti.

Pu Ronald Sapa Tlau, MP(RS) pawhin thusawiin, India rama mau awm zawng zawng atanga 35% chu Mizoramah a awm thu a sawi a. Mau leh rua te hi a hlutna hmuh chhoh zel anih avangin ‘Green Gold’ (rangkachak hring) ti hiala vuah a ni tiin, central sorkar pawhin Mizoram chu Bamboo State a siam a tum mek a ni a ti a. Sumdawnna lama kan hlawhchhamna chhan ber pakhat chu a hralh harsatna, market a nih thu sawiin, tunah chuan market linkage anih theih a beiseiawm a ni a ti.

IKEA hian Mizorama thil siam chhuaktu, entrepreneur te nen inkutsuihin thingtlang mite nen inkungkaihna tha zawk an theih ngei a beisei thu a sawi a. IKEA hian eng mau/rua chi nge an duh an rawn sawi thin dawn a ni a ti. IKEA hian kum khatah Euro tluklehdingawn 32 an lei thin a, ram 52 ah supplier 1000 chuang an nei mek a ni. Kum 27 chhung India atang hian mamawh alo lei thin a, tunah hian an hmunpui atan Hyderabad an tinzawn mek bawk a ni.

Workshopah hian IKEA(India) Project Leader Pu Rajashekar P.Warrier chu ‘Resource Person’ niin, powerpoint hmangin IKEA chungchang leh hnathawh dan, khawvela a inzarpharh dan leh thil dang dang a hrihfiah a. Sawihona hun leh zawhna leh chhanna hun hman chhunzawm a ni.

Workshop hi Pu Lalram Thanga, Principal Secretary to Chief Ministerin a kaihruai a ni.