Vawiin hian Lawngtlai Central YLA Hall ah Fire Prevention Week 2016 hawnna neih a ni a, Pu J. Hmingthanmawia, Lawngtlai Bawrhsap chu khuallian niin he Week hi a hawng a ni.

Thu sawiin Pu J. Hmingthanmawia chuan, kan thing leh maute hi kan tuihna hmuhna atan te, boruak thianghlim leh hrisel min petu atan tea Pathianin min pek a ni. Amaherawh chu mawlna leh sualna avangtein kan halin kan ti chereu leh mai thina a pawi em em a ni. Chutihlaiin Lawngtlai District ah ram kang venhimna lamah tun hnaiah nasa takin hma kan sawna, nikum hmasaah District inelnaah pathumna kan ni a, nikumah phei chuan pakhatna kan ni ta hial a, a lawmawm hle a ni. He kan lawmman dawn hi kuminah pawh hum tumin theihtawp kan chhuah dawn a ni, a ti a. Chutiang taka hlawhtling tur chuan YLA, YCA te, VC te leh tlawmngaipawl hrang hrang leh mipuite tawiawmna kan ngen a ni, a ti bawk.

Khualzahawm Pu KC Malsawmdawngliana, EM i/c Forest LADC pawhin thu sawiin kuminah ram kang lakah kan him theihnan LADC chuan theihtawp a chhuah dawn a, dan bawhchhiaa sawrkar runluih tute chungah dimdawina a awm vak thei lovang tiin hmalak an tum dan a sawi bawk a. Mipuite chu thing leh mau hlutna hrechianga ngaihlu turin a ngen a ni.

An ni bakah hian Pu Albert Lalrinzuala, RO, LADC chuan a lem nena entirin ram kang pawizia leh mihringte tana a thatlohzia zirtirna a nei nghal bawk.

Kumin hian Lawngtlai District Level Fire Prevention Committee chuan District chhunga khaw tinte tan ram kang venhim kawngah inelna thianghlim a buatsaih leh dawn a, a ti tha khaw pathumte hnenah lawmman tha tak pek an ni ang.

State Level Fire Prevention Committee ruahman ang chuan he Week hi nimin khan hawn tur a ni a, amaherawh chu Home Minister hova 3rd Battalion IR hmunpui tur Lungphum hmanna hun ruahman sa a lo awm tawh avangin vawiin lamah hman a ni ta a ni.