Mizoram sorkar hnathawkte tan vawiin khan Assembly Annexe Conference Hallah Chief Minister hoin sum renchem leh sum lakluh dan chungchang ‘Sentitization of Government Officials on Economy Measures & Resources Mobilisation’ tih inhrilhhriatna neih a ni.

Chief Minister chuan sum inrenchem chungchang hi kan sawi fo tawh a, sawi nawn leh thin hi a ngai a ni a ti a. Hun khirh tak kan hmachhawn mek a, thutlukna khauh tak pawh siam ngaihchang a awm dawn a ni a ti a. Tuna kan sum dinhmun hi a hniam hle a, hreh tak chunga thutlukna khauh tak, mahse tha bawk si lak hi kan hreh tur a nilo a ti.Chief Minister chuan kum tam tak kalta atang khan sum hman tlem hi kan thupui ber thin a ni a, nimahsela tihpuitlin erawh a harsa a ni a ti a. Finance department pawhin vawi tam tak inrenchem a tul thu a chhuah thin a, heng thuchhuahte zawm a hlawh thalo hle thin a ni a ti a. Officiala zin leh motor petrol chungchangah kan inhrek hle a tul a ni tiin, Delhi kal ngai kher loin Delhi Mizoram House a Officer on Special Duty (OSD) sorkarin a dah thar hi a hman tangkai theih a ni a ti.

Chief Minister chuan tul bik tak takah lo chuan hna thar siam leh motor thar lei te hi khap a ni a ti a. Tunah hian motor enkawlna leh workshop bill tam tak sorkarin pek tur a nei a ti a. Hetih lai hian official ten an zinna TA/DA an hmuh theih chung pawh a pawisa tham ching an awm hi sim tur a ni tiin, petrol quota piahlama coupon dil ching an awm thin te hi an inbihchian hle angai a ni a ti a. Inrenchemna tura hmalaknaah te lua a awm lo tiin, sum harsatna sutkian kawngah kan thiamna leh theihna thawhkhawma tan kan lak tlan chuan thlaphanna tur a awmlo a ti a. Hmasawnna chu a kal reng tho a, keimahniin kan tih tur ang ang kan ti tur a ni a ti. Khawsak chungchangah te mahni lakluh mila khawsak thiam turin mitinte a chah bawk a ni.

Finance Minister Pu Lalsawta chuan kan state sum leh pai dinhmun leh harsatna hi tun kum hnih khat thila lo awm a nilo tiin, kum tam tak atanga lo inmun chho tawh, kum tela lo nasa hret hret a ni a ti a. Abikin kum 2008 - 2009 chhoa khawvel ram hrang hranga recession ina a nghawng kal zel kha a ni a ti a. Chuvangin vawi leh khata siam that thut theih a nilo a ti a.Tan kan lak mar pat reng angai a ni a ti.Sum inrenchem kawngah hian Finance department chuan hma a la zui ang a ti. Pu Lalsawt a chuan kum 2013 -14 chhungin sum hmuh chu cheng vaibelchhe 424.25 niin, kum 2014 -15 chhungin cheng vaibelchhe 548.87 lakluh beisei a ni a ti a. Hei hi kan GSDP 2.59% leh 2.76% chauh a ni a ti a. Buhfai, tui leh electric a subsidy a pek avangin sorkarin thla tin cheng vaibelchhe 26 vel a hloh ziah a ni a ti a. Thla tina sum kan hmuh leh hman dan tlangpui pawh, sum lakluh zat chu cheng vaibelchhe 261.13 anih laiin kan hmanral erawh chu cheng vaibelchhe 329 vel a ni a ti.

Inkhawm kaihruaitu Chief Secretary Pu Lalmalsawma, IAS chuan Mizo te hi a hnam anga sum hmang thiamlo, hmuh ang ang hmang mai zel kan ni a ti a. Central Pay Scale kan hman pawh hi Mizoramah chuan kan hmang sang zawk a ni tiin, engtik hunah emaw chuan kan sum lakluh mila pay scale te hi kan siam tul hun a awm a rin thu a sawi bawk.

Inkhawmah hian department hotu ten inpawh takin sum inrenchem chungchangah sawihona an nei bawk a ni