Niminah khan Saitual, Keifang, Rulchawm leh Ruallung khua te tui tlan tur Greater Saitual Water Supply Scheme hna kallai chu Home Minister Pu R.Lalzirliana, bialtu MLA ni bawk leh PHE Minister Pu Zodintluanga ten an tlawh a. He project atana sum ruahman Rs. 21,53,20,000/- hi NLCPR atanga hmuh niin Excelsior Merchants Private (Ltd), Kolkata ten contract hi an thawk a ni. Tuilakna hmun, raw water pump house hi Tuivawl Luiah siam mek a ni a, Tuivawl kam ah treatment plant, clear water pump leh 33Kv transformer bun niin tui pump chhoh thlenna hmun, main reservoir hi Saitual khawdai, Saihmar tlang chhip ah siam a ni thung.

Minister pahnih hi PHE Chief Engineer Pu Lalremsiama, Er. Lalrammawia, SE, Er Lalnuntluanga, EE leh he project viltu Er Z.D. Dengthuama, EE ten tawiawm in Tuivawl lui ah hian Excelsior Merchants Private (Ltd) hotu pahnih Pu Gulshan Sethi, Director leh Pu Rana Ghosh, Project Manager ten an lo dawngsawng a ni. Home Minister Pu R.Lalzirliana chuan PHE Minister Pu Zodintluanga nen helai hmun an tlawh chhan chu hnathawk chak vak lo anga sawi enfiah an duh vang leh chak zawka hna kalpui a nih theihna turin kawng zawnpui an duh vang a ni a ti a. Tuivawl in a kuang a sawn vanga hnathawh a chak hleitheilo chu pawi an ti thu leh contractor te hi kum in fur tlak hma ngei an hna te zo hman turin a hrilh a ni. Home Minister chuan he tuilakna hi puitlin a nih hun chuan Saitual town area hian kum 30 thleng pawh tui khamkhawp an hmuh a beisei awm a ni a ti.

Excelsior Merchants Private (Ltd) hotu te hian PHE Minister Pu Zodintluanga lo bia in an hna muan chhan te leh hmalak an tum dan te an hrilh a. Mizoram District khawpui thenkhat a tuilakna pawh an kutchhuak a nih thu sawiin Greater Saitual Water Supply project pawh hi tha taka thawh zawh a nih tur thu an hrilh a ni.

Greater Saitual Water Supply Scheme hian mihring 35,000/- nitin tui mamawh pe thei tura ruahman a ni a. Kum 2011 chhiarpui a alan dan chuan Saitual town area ah hian mihring 10,779/- an awm mek a ni. PHE Chief Engineer Pu Lalremsiama chuan Saitual town area ah tuizem 42 lakh Litre an neih mek thu leh heng tuizem te hi pipe a thlun zawm vek a nih tawh thu a sawi a. Hna hi an uluk vangin chak taka kalpui puat puat a theihlohva kum in thal chhung ngei erawh chuan thawh zawh hman tum a ni a ti.

Tuivawl atanga tuithianghlim pump chhohna hmun main reservoir hi 6.5 Km a ni a, tui pump chhoh te hi main reservoir, Saihmar Tlang atangin hian gravity hmang tangkaiin Helipad tlang a tuizem leh hmun dang a tuizem ah te khawl a ni dawn a ni. Ruallung khaw awmna a hansan deuh avang erawh chuan an khaw tui pump chhohna tur booster pump chu Rulchawm ah bun tum a ni.

Project viltu Er Z.D. Dengthuama, EE chuan Saitual town area vawikhat tui pek nan hian a rei ber ah darkar 9 bak a ngai dawn lo niin a sawi a. Khawchhung a pipe hman mek te erawh chu a tuiek chhiat nasat tawh a vangin hun remchang a awm huna thlak a ngai dawn niin a sawi a ni. Technical report a tarlan dan in Tuivawl lui atanga treatment plant thleng tui han pump chhohna, raw water pump hian darkar khat chhungin meter 150 a sang ah tui 86 cubic metre a pump chho thei a. Clear water tank atang hian Clear water pump in tuithianghlim darkar khat chhunga cubic meter 41 chu 750 metre a sang main reservoir ah a pump thleng leh dawn a ni. Booster pump, Ruallung tui pekna tur hian darkar khat chhung in 95 Metre a sang ah tui 22 cubic metre a pump chho thei bawk a. Clear Water Treatment Plant in nikhat chhunga tui a khawl theih zat chu 2900 cubic metre a ni.