He thu hi Horticulture Minister Pu P.C. Lalthanliana’n nimina Hortoki khua a tlawhnaah thlai chingtu ‘Farmer’s Interest Group’ panga te hnenah Rashtriya Krishi Vikas Yojana (RKVY) hnuaia pawl tanpuina sum leh tui pump khawl 10 hlanna programme Horticulture Department-ina an buatsaiha a sawi a ni.

Nimin khan Horticulture Minister Pu P.C. Lalthanliana, Parliamentary Secretary Pu K. Lalrinthanga leh Parliamentary Secretary leh bialtu MLA ni bawk Pu Hmingdailova Khiangte te chuan Hortoki khua tlawhin Tlawng kam nul-a Hortoki khua chhungkaw 200 dawn ten thlai huan an siam te chu a hmuna kalin an hmalakna te an enpui a. He programme-ah hian Pu P.C. Lalthanliana chuan kuthnathawktute leh thlai chingtute hi Sawrkar chuan a thu nilovin a takin a ngaituaha, an hmakhua te chu engtik lai pawha Sawrkarin a ngaihpawimawh a ni, a ti a. Kuthnathawktute hmalakna a hmun ngeia kal a, enpui an duh avangin ama hova Parliamentary Secretary pahnih ten nen Hortoki khua ah thlai chingtu te hmalakna leh hlawhtlinna a thu an hriat thin chu mit ngeia hmuh a duh avangin a hmuna enpui a, Sawrkar angin enge tih thei awm te, enchian leh hrethiam tura lo an nih thu a sawi a. “Hausak tumin thawk lovang ang u, hlawtling turin thawk zawk ang u” tiin he hunah thlai chingtu kalkhawmte chu a chah a. Thlai an la chin ngai loh ang chi tomato, broccoli leh adangte pawh Kolasib Horticulture Division hmalaknain Hortoki ah bultan tum a nih thusawiin tih takzeta kuthnathawktu ten an thawh zel chuan Sawrkarin a theih ang angin a pui zel dawn a ni, a ti.

Thlai chingtu leh kuthnathawktu ten an mahni thawhrimna phu tawk anga an thawh rah an seng a pawimawh thusawiin chu chu hre reng chunga kharchhawngtu ten anmahni an duhsak a tul a ni, a ti a. Thil sem te hi mimal anga tih sen anih loh vangin intawma thil hman te hi Farmer’s Interest Group, Community Water Tank angtea kaltlangpui anih hian mi tam zawkin a hlawkna an tel thei nia a hriat thu a sawi bawk.

Nimin vek khan Horticulture Minister Pu P.C. Lalthanliana chuan Hortoki khua a thlai chingtu ten tangkai taka an hman atana RKVY hnuaia Pack House leh Godown sak thar te leh Tlawngkam Damdiai Thlangta Zau a Community Water Tank pahnih leh Tlawngkam Zau a Individual Water Tank siam te chu a hawng nghal bawk a ni. Thlai thar dah khawmna tur kudam hi feet 36 a sei leh feet 15 a zau a ni a; a chhung ah hian Motor lian phur 10 zeta tam dah khawm theih beisei a ni. Thlai thar dah thatna tur Pack House feet 16 a sei leh feet 10 a zau siam a ni a; a chhungah thlai chhe hma zual bik dahna tur Cold Room pawh siam nghal a ni bawk. Tui dah khawlna tur hmun Community Water Tank 2 siam ah hian tui litres 98125 ve ve leng thei tura siam a ni a. Hei bakah hian hmun dangah Individual Water Tank siam ah hian tui litre 25800 a dah thei a ni.

Farmer’s Interest Group panga ah hian mi 20 zela in thenin a vain mi 100 an awm a, Group tin account ah hian sumfai cheng 1,71,500 theuh dahsak an ni a. He sum hmang hian kum danga pawisa neih loh vanga an tih theih loh pawh an tih theih phah beisei a ni a. Thlai thar an hralh hunah an hnawh khat leh zel dawn a ni.

Hortoki khua ah hian in 600 vel a awm a, za zelah chhungkaw 80 vel chu huan neia thei leh thlai chinga eizawng tute an ni a. Chhungkaw 200 vel hian Tlawng kam nul ah hian huan siamin thlai chi hrang hrang an ching a, an thlai tharchhuah te hi kharchhawngtute an hmuna kalin an leisak thin a. Mai-te, mai, bean leh antam leh thlai dang an tharchhuah te hi Aizawl leh a chhehvel chhawmtu ber a ni, heng bakah hian vaimin leh kawlbahra te pawh an hralhchhuak nasa bawk. Thlai an chinna ah hian hlo leh fertiliser eng chi mah an hman loh avangin an tharchhuah hi tunlai khawvel in a ngaihsan ber ‘organic product’ a ni nghe nghe a ni.

Tlawng kam nul ah te hian thal lai October thla tawp lam atangin thlai an ching tan thin a, February thla tawp thlengin thlai an ching thei a, fur ah chuan heng ram te hi tui in a chim avangin huan a siam theih lo a ni. Thla 4 lek thlawhhma an nei chhung pawh hian chhungkaw tam takin an thawhrimna rah an seng a. Tin 3 hmuna thlai chi hrang hrang chingtu Pu Challianngura chuan ‘Thla 4 chhungin hah takin kan nupa in kan thawk a, thlai nuai 3 man vel kan lei thei a, kharchhawngtu hnenah pe lovin Aizawl lamah mahni in hralh thei ila chuan kan hah man tha zawk kan hmu thei ang’ a ti.

Nikum khan bean chi quintal 10 leh mai chi quintal 1 chu Horticulture Department chuan Hortoki khua a mi an leisak. Nikum khan Hortoki khua hian thlai nuai 80 atanga nuai 100 man hu an hralhchhuak a. Hortiki khua hi Seed Village atan Sawrkarin a lo puang tawh bawk a ni.

Tunhnai khan Horticulture Department hnuaia Horticulture Division Office Kolasib chuan chak takin hma an la mek a. Hortoki khua ah hian Farmer’s Interest Group te an dinpuia, thlai chi, pipe leh tui pump khawl te semin thlai tui pekna turte an ruahman a, thlai chi hrang hrang chinna tur Unit 54 RKVY hnuaia an kalpui mek a. Tui pump khawl an sem leh thlai tui pekna tur Horticulture Department in an ruahman hian kum danga thlai an chin theih lohna hmuna te pawh thlai an ching thei tura beisei a ni a, hei hian an tharchhuah pawh a tih tam ngei beisei a ni bawk.