Vawiin January 16, 2015 chhun dar 1:00 khan Minister Pu John Rotluangliana’n a department enkawl pathum FCS&CA, Transport leh Tourism-a department Officers te a Office ah kumthar thingpui inpuiin an hmalakna pawimawh zual te a sawipui.
FCS&CA Department-in buhfai man a tihsan chungchangah political party thenkhat ten mirethei leh harsa zawkte rawkna ang hiala an sawi chu Minister chuan thu dik lo a ni tiin mi rethei zawk BPL leh AAY te chanvo hi pakhat mah a rate tihsan a nih loh thu te, a rate ngaia an lak mek thu leh an lak chhunzawm zel tur thu a sawifiah bawk. Tuna buhfai man tlema sang deuha Supply Department-in a han tih te hi chu APL (Above Poverty Line) - mirethei leh harsa te chunga mi an ni.
Minister chuan buhfai man tihsan chungchangah, Central atanga kan hmuh rate san leh san loh lam nilovin mipui mimir APL (Above Poverty Line) ten buhfai kan mamawh belh zat hi thla tin quintal 80,000 a ni, a ti a. Hei hi FCI atangin quintal 1 zelah Rs 2981/- in kan la thin a. Amaherawhchu, FCI rate hi a san deuh avangin Mizoram Sorkar in Local Supplier atan quotation koh a ni a. Chuta chhang hniam ber rate chu quintal ah Rs. 2575/- a ni a.
FCI rate aia a tlawmna chu Quintal ah Rs. 406/- a ni a. Quintal 80,000 ah phei chuan Sorkarin pawisa a hum chu Rs 32480000 (Cheng Vaibelchhe 3, nuai 24, leh sing 8) a ni. Tin, tuna buhfai man tlema kan tihsan hretna hi Quintalah Rs. 550/- a ni a. Tichuan, quintal 80,000 ah chuan Sorkarin Rs 4,40,00,000/- (Vaibelche li leh Nuai Sawmli) a hmuh belh dawn a ni, a ti. FCI atanga lei lova local supplier atanga leia a inthlauhna chu Rs 3, 24,80,000/- (Vaibelchhe thum Nuai Sawmhnih Pali leh Singriat) a ni a. Tin, a hralhna rate quintal ah Rs 550/- a a san avanga Sorkarin a hmuh let Rs 4,40,00,000/- (Vaibelche li leh Nuai Sawmli) nena belh khawmin Rs 7,64,80,000/- (Vaibelchhe Sarih Nuai Sawmruk Pali leh Singriat) hi Sorkarin thlatin a hum a. Kum khatah chuan Rs 91,77,60,000/- (Vaibelchhe 91 Nuai 77 leh Sing 6) lai a hum a ni. Tin hei bakah hian Local Supplier hnen atanga buhfai lak hian Tanhril FSD (FCI) to Zuangtui, Supply Kudam a buhfai phurh man Rs 60 /quintal zel sum kan hum bawk a ni, Minister chuan a ti.
Gas connection chungchangah Central Sorkarin subsidy a pek theih chu chhungkaw tinah connection pakhat zel a ni a. Subsidy kher lo atan phei chuan connection duh zat zat a neih theih a ni. Tunlaiin, DBTL (Direct Benefit Tranfer of LPG) chungchangah chhungkaw khatah Gas connection subsidy pahnih / pathum neih duh avangin ration card te split-in Bank Account tharte hawnga thil diklo ti a hma la mek an awm tih hriat a ni a. Minister chuan heng hi keini Mizo Kristian te hian kan tih hauh loh tur a ni, a ti. Tin, Gas Agent te pawhin hming thlak man leh lo buaipui man – administrative charge atan te pawisa an la thin tih hriat a ni a, hei hi tih tawh loh tur a nih thu leh pawisa an lo lak sak zawng zawng pawh pe let leh vek tura ngen leh hriattir an nih thu Minister chuan a tarlang bawk.
Tourism Department hmalakna chungchang ah Tourist Lodge 25 privatise tum a ni a. District Council hrang hrang awmnaa Tourist Lodge awmte pawh Council te hnuaia awm tura hmalak mek a ni. Thalfavang Kut, 2014 hlawhtling taka hman a ni chu Minister chuan lawmawm tiin Kut hman nana Ministry of Tourism lamin pawisa an rawn tum vek thu a sawifiah bawk.
Transport Department hmalakna chungchangah District Khawpui hrang kawk Bus service tir chungchang sawi a ni a. Mamit leh Champhai district ah chuan Bus leh a thawktu tur staff te dah fel an ni tawh a, February, 2015 atang chuan thawk tan thei tura beisei an ni bawk.
