State Technical Entrance Examination (STEE) kaltlanga Biology Groupa zirlai thlan chungchanga MZP ten nawrh an huaihawt kal zel chungchangah vawiin khan sorkar hmalak dan tur ngaituahin Chief Minister Pu Lal Thanhawla chuan Minister thenkhat, Chief Secretary leh official pawimawh dangte nen a office cabinet room-ah a sawihopui.

Meeting-ah hian Chief Minister chuan MZP te thil ngiat chu kan duh tlan vek anih thu sawiin, dan lam atanga thlir a thil tih theih ani em tih hriatchian hmasak tul a ni a ti a. Supreme Courtin thutlukna a siam tawhah, indigenous tih hian scheduled tribes te a huam vek thu a sawilang a. Tuna kan buaina hi dan tlawhchhan chunga a chinfelna tur awm ang ang te sawihoin MZP hruaitute chu hriattira sawipui nghal nise tiin, hemi sawihona hi Chief Minister conference roomah nei nghalin, Home Minister Pu R.Lalzirliana’n a kaihruai a ni.

MZP hruaitute nena sawihonaah hian MZP te thil phut chu hun engemaw chen sawiho a ni a. Sorkar lam chuan dan bawhchheloa tih theih awm ang leh dan neihsa siam that ngai laite siam that nise tiin inremna siam theih a ni a. Hemi inremna bawhzui hian MZP chuan an nawrhna huaihawt chu an ti tawp nghal a, MZP hruaitu mante pawh chhuah nghal an ni bawk a ni. Inremna thu nemnghet tur hian MZP President tanin atang chhuah anih hnuah a hoin meeting an nei zui a, an thu tawp pawh Higher & Technical department hotute hriattir leh nghal nise tiin meeting chu Minister Pu R. Lalzirlaina’n tawngtaina neiin tih tawp a ni.

Meeting-ah hian Biology Group-a Chakma zirlai thlante hi mi pali an ni a, an zinga BDS zir tura thlan chu zirna hmun dang a hmuh avangin a inhnukdawk a, adang mi pathumte hi RIPANS a zir turte an ni. Engineering groupa zir tur thlan pahnihte pawh Joint Entrance Exam paltlang an nih thu tarlan a ni bawk.

Meeting-ah hian Minister te Pu R. Romawia, Pu Lalsawta, Pu Zodintluanga, Pu Lal Thanzara, Cheif Secretary Pi L. Tochhong; Principal Secretary to Chief Minister Pu Lalram Thanga; Law Secretary Pu Singthanga leh IGP Pu Zorammawia te an tel a ni.