Vawiin khan Chief Minister Office cabinet room-ah thalaite hmakhua tur Chief Minister Pu Lal Thanhawla hoin sawihona neih a ni.

Sawihonaah hian Aizawla IAS Coaching Centre din chungchang leh Phillipines a MBBS zir chungchangte sawiho a ni a. Chief Minister Pu Lal Thanhawla chuan Mizoram buai hma ah central service ah leh sipaiah Mizo ten kan thawhhlawk thin thu sawiin, buai hnuah kan tlak hniam tak avanga Mizo thalaite tam zawk an luh leh theihna tura sorkar hmalakna, Mizoram Youth Commission in a bawhzuinate sawiho tura he meeting hi neih a nih thu a sawi a.

IAS Coaching Centre din tur atan New Delhia Chanakya IAS Academy chu biakrawn an nih thu leh he meetinga tel ve tura a Managing Director leh neitu ni bawk Pu A.K.Mishra chu sawm a ni a. Mishra chuan training hun chhung tur chu thla sawm (10) anih tur thu leh training turte chu uluk taka thlifimin, entrance exam te neih hmasak tir tur anih thu a sawi a. Prelims leh Mains atan training hranpa siam anih loh tur thu leh Aizawlah hmun nghet siam a, faculty turte pawh Delhi atangin an rawn awm chilh tur thu te sawiin, library pawh dah ani ang a ti. Mishra hian a Academy kalpui dan kawng hrang hrangte powerpoint hmangin meeting hi a hrilhfiah bawk a ni.

Kum 1993 a din, Chanakya IAS Academy hian central service hrang hrangah mi 3000 chuang a chherchhuak tawh a, IAS top ten ah tling awm thinin, nikum 2014 khan academy atang hian mi 353 an tling a ni. India ram pumah centre 11 an nei a, a hnuhnung ber chu kum hniha upa, Guwahati ah din a ni.

Meeting-a tarlan angin, Mizo thalai MBBS zir duhte tan Phillipines a DAVAO Medical School Foundation chu be bawkin, vawiina metinga tel tur hian Pune a an centre atanga an hotute sawm an ni bawk a. An hotute chuan MBBS zir chhung chu kum li a nih tur thu leh Phillipines a an kal hmain Pune ah ‘basic course’ thla 8 chhung zirtir phawt an nih tur thu an sawi a. Kum li chhunga senso zawng zawng ngai tur chu Rs.24/- lakhs anih thu an sawi bawk.

Meeting-ah hian Finance Minister Pu Lalsawta, H&TE Minister Pu R.Romawia, Planning Board Vice Chairman Pu H.Liansailova, MOS for LE&IT Pu Lalrinmawia Ralte, Mizoram Youth Commission Chairman Pu T.Sangkunga leh Principal Secretary to Chief Minister Pu Lalram Thanga te an tel a ni.