Vawiin khan Chief Minister Pu Zoramthanga kaihhruaiin Parking House Committee for PAHOSS ( Parking House Support Scheme) chu CM Cabinet Meeting Room ah thukhawmin, hmalakna e thlirho a ni.

Aizawl khawpui lun laia lirthei dah (park)-na awm tlem avanga buaina tiziaawm tura Parking House siam tumna chu mi engemawzah atangin an In sak lai leh sak turte parking house a siam duhin dilna sawrkarah an thehlut tawh a. Vawiin thutkhawmah hian heng te hi thlirho niin, a thawh khatna atan 46 chu pawm niin, Aizawl chhim, hmar, thlang leh chhakah te a vaiin Heng Parking House vang hian lirthei 1036 park-na hmun a awm dawn a ni. Heng parking house pawm takte hi a then chu reilote a hman nghal theih tur niin, hmun thenkhatah chuan sak lai mek leh la din chawp tur te pawh a tel a ni.

Chief Minister chuan Parking House chu a In neitute tan sum lakluhna hlawk thlak tak a nih tur thu leh an ram kha sawrkarin a neih sak tihna a ni lova, vantlang tan tangkaia siam turin sawrkar sum puihna nena hma lak dunna a nih thu a sawi. Parking House-ah hian mimal In dinglai emaw hmun ruak remchang, parking house sakna tur atana hman theih an neih chuan vantlang motor park na hmun atan sawrkarah an dil thei a. Motor park-na fee hi In neituten a vaiin an chang zel ang a. A tlem berah parking house pakhatah han LMV panga emaw 2-wheeler 30 tal a leng tur a ni a. Sawrkar atangin motor pakhat (LMV) ah emaw 2-wheeler paruk zelah tanpuina cheng nuai khat (1 lakhs) Parking House neitute hian an dawng dawn bawk a ni.

Vawiin meeting-ah hian AMC Mayor Pu P.C. Lalhmingthanga, Chief Secretary Pu Lalnunmawia Chuaungo, DGP Pu Balaji Srivastava, Finance Commissioner Pu Vanlalchhuanga, Planning Secretary Dr. C. Vanlalramsanga, IGP Pu LH Shanliana, PWD Engineer-in-Chief Er. Lalsawmvela, PWD Chief Engineer, UD&PA Director Pu Joseph H. Lalramsanga leh officer dangte an tel a ni.