Vawiin Chawhma dar 11:00 khan DIET Serchhip Multipurpose Hall ah Pu Lalchhandama Ralte, Hon’ble Minister, School Education Department etc. hovin Education Campaign neih a ni.

Minister chuan, Mizoram sawrkar department zinga lian ber leh thawktu ngah ber Education Deparment hi sawrkarin a ngaipawimawh hle a, zirna lama hma kan sawn zel theih nan budget pawh dah tam a ni, a ti.  Kan rama zirnain ah te sawrkar school aia mimal leh kohhran enkawla zirlai an tam zawk tlat mai leh result pawh an nei tha zawk fo thin chu ngaituah chian a tul hle a a ngaih thu a sawi a. Sawrkar schoola zirtirtuten kan puanven te sawi chhing a kan intuaithar a tul a ni, a ti a. An zahawmna vawnghim a, hun vawng dik tur leh zirlaite tan an thiamna leh theihna hmang chhuak thar leh turin a chah a ni. Minister hian Kum 2015 atanga hman tan Continuous and Comprehensive Evaluation (CCE) sawrkarin ennawn a tiam ang ngeia an ennawn mek thu sawiin, exam kalphung pangngaia let leh a school calender pawh tihdanglam anih tur thu a sawi a ni. Kan rama zirnain hniam lam a pan chhan ni a lang pakhat zirtirtu indaihlohna pawh  hnawhkhat turin sawrkarin hma a la mek a ni, a ti. Zirnain hma a sawn lehzualna tur atan tunhma lama kalpui thin tawh School Inspection pawh kalpui thar anih tur thu a sawi bawk.

Sawrkarin zirtirtu tha tak a lak sak a, a thlawn a zirlaibu, uniform leh chaw chhun a pe chung pawha Mizoram puma zirlai zaa 60 ten private school an la thlang zawk tlat hi zirtirtute kan inenfiah a tul nia a hriat thu a tarlang a, zirtirtute lakah sawrkar thikthu a chhe dawn a ni, tiin zirtirtu kalkhawm te theihtawp chhuah turin a fuih a ni.  Tin, Minister hian zirtirtu kalkhawmte chu zirlai piah lamah zirlai naupangte chu Mizo hnam nunphung, tlawmngaihna, aia upa zahna te zirtir tel thin turin a chah bawk. 

Khuallian hian DIET Serchhip in lehkhabu an siam SCIENCE THUMAL HRIILHFIAHNA tih chu a tlangzarh a, District Educaton Committee leh SSA Mission Serchhip tangkawp te buatsaih Mid Day Meal Kitchen Garden nei thate lawmman a hlan nghal bawk. MDM Kitchen Garden lawmman dawngtute chu pakhatna Govt. Primary School IV Serchhip, pahnihna Govt. LM Middle School, Serchhip leh Pathumna Govt. Ngentiang Middle School leh Govt. Middle School Serchhip te hnenah lawmman a hlan nghal a ni.

He hunah hian Pu Lalrinsnga Ralte, Serlui Bialtu MLA pawhin thusawiin ramin eizawnna leh zirna kawngah hma sawn zelna atana pawimawh, zirlai naupangten thiamna leh  eizawna tura mahni inrintawkna an neih theih nan zirtirtute chu tihtakzet leh inpekna thar nen a zirtir hna thawk thar theuhin turin a chah bawk. 

Pu Lawmawma, District Education Officer, Serchhip chuan kalkhawmte lawmna thusawiin, India ram puma zirna dinhmun tehna National Achievement Survey(NAS) a Mizoram leh Serchhip District dinhmun tlangpuiin a tarlang bawk.

Eduction Campaig hi Pi Esther Lalruatkimi, IRS,Commissioner & Secretary, School Eductaion Department in  a kaihhruai a, he hunah  Serchhip khawpui chhunga sawrkar enkawl school, Primary  atanga  Higher Secondary School zirtirtute, Federation Mizoram Government School Teacher’s (FMGST) hruaitute leh Serchhip DIET a thawktute an tel a, Pi Lalzarmawii IAS, Director of School Education in lawmthu sawina hun a hmang bawk.