Vawiin khan Chief Minister Pu Lal Thanhawla, Cricket Association of Mizoram (CAM) President ni bawk hovin Aijal Club-ah General Body Meeting neih a ni.
Chief Minister chuan Cricket chu Mizo thalai te thiam zawng tak tur, ramchhung leh pawn thleng pawha hmingthan theihna tur nia a ngaih thu a sawi. Sports discipline hrang hrangah Mizo hming a langsar tawh viau a, football-ah phei chuan thalai engemawzatin eizawnna tha tak an hmu tawh a, chutih laiin cricket-ah erawh Mizo hming a la lang ve lo chu pawi a tih thu a sawi a. Cricket hi eizawn nan a tlak chauh ni lovin hausakna a awm a ni, a ti. Cricket hmasawnna ngaihtuah turin Cricket Association of Mizoram din a nih hnuah Cricket pawhin hma a sawn phah hle tih sawiin tuna CAM hmalak mekna a thil pawimawh tak, Board of Control for Cricket in India (BCCI) a affiliation hmu turin chak taka hmalak a ni, a ti a. Amah ngeiin vawi duailo BCCI a thuneitu sang dawr tawhin BCCI Annual General Meeting pawhin a pawm tawh a. Affiliation Committee thuchhuak an nghah mek laiin India rama Court sang ber inrawlh hial ngai khawpa BCCI chhungkua-ah buaina a chhuah tak avangin tun dinhmunah affiliation an hmu mai thei lo a ni, Pu Lal Thanhawla chuan a ti.
Pawl reng reng hlawhtling tur chuan a atchilh tlat mi an awm a ngai tiin Pu Lal Thanhawla chuan CAM hruaitute zingah chutiang mi tam tak an awm chu lawmawm a ti a. Mi thahnemngaite inpekna avangin Mizoramah Cricket World Class Stadium, Suaka Memorial Cricket Stadium a awm tawh a, he stadium sakna tur ram a thlawna petu Pu Rotluanga Fanai chu fak nawn lehin a inpekna chu Mizoram Cricket history-ah a reh tawh ngai a rinloh thu a sawi. Club hrang hrangte taima lehzual tura fuihin thalaite tana khawvel thar siamna kawngah Cricket hi a pawimawh ber te zing a mi a ni, Chief Minister chuan a ti bawk.
Inkhawm hi CAM Working President Pu Lalrochuanga Pachuau chuan kaihruaiin an pawl chetvelna leh sum dinhmun report ngaihthlak a nih bakah rorelna an nei zui nghal a. An thu ngaihtuah zingah Information & Publicity Sub Committee din te, youth development uar zawka kalpui leh school thlanbika Cricket infiamna lakluhte, tournament zawng zawnga hman theih tur inkaihruaina dan changtlung zawk siamte a tel a ni.
CAM hnuaiah hian full member Club 14 an awm a. October 2013 atanga March 2014 chhung khan tournament vawi 8 an nei hman. Cricket Academy pahnih Durtlangah leh Ramhlun Sports Complex-ah te awmin naupangte hnenah Cricket Coaching pek mek a ni.
