Mizoram Science, Technology & Innovation Council (MIRSIC) hnuaia ‘Mizoram State Climate Change Cell’, NABARD Consultancy Services (NABCONS) leh Indian Himalayas Climate Adaptation Programme (IHCAP) tangkawpin vawiin khan Aijal Club-ah ‘Level 1 Orientation Programme for Legislators & Bureaucrats on Capacity Building for Climate Change Adaptation Planning’ neih a ni a. Secretary, Planning (Climate Change) Dr.C.Vanlalramsanga kaihhruai he Orientation Programme Leevel 1-ah hian Chief Minister Pu Lal Thanhawla chu Khuallian niin Khualzahawm Planning Minister Pu Lalsawta leh Home MInister Pu R.Lalzirliana te an tel bawk.

Khuallian Chief Minister Pu Lal Thanhawla chuan khawvel thangzelah mihring leh mamawh pung zel chuan nasa takin boruak, sik leh sa a khawih danglam mek a, Mizoram-ah ngei pawh kumtira ruahsur chu tun thla November thleng hian a la bang lova, khaw that chhung a rei lo em avangin sorkar hmalakna pawh tisawt lo hle a ni, a ti. Hei hian climate change leh environment inthlak danglam chak lutuk laka kan inven theihna tur leh chumi mila kan nunphung insiamrem dan tur chu mitin mawhphurhna leh tihmakmawh a nih tih hmuh theih maiah pawh a tarlang chiang tawh a ni, a ti bawk. Kum 50 kalta chhung khan climate change chuan Mizoram a ni emaw Himalaya tlang sang ber berte a ni emaw khawpui lian tak tak te ni emaw nasa takin a nghawng mek zel a, chuvangin eng sorkar pawhin ram hmasawnna tura ruahmanna a siam zawng zawngah boruak, sik leh sa inthlakdanglam chu vei a, chumi mila ruahmanna siam zel an tum tawh a ni, a ti. Mizoram thingtlang khuate mangan rukna pakhat chu an tuihnate kang chat mek chu a ni a, heng khuaahte tui supply dan tur ngaihtuah a ngai ta a ni tih Chief Minister hian a sawi bawk a. Mizoram sorkar chuan NLUP leh NEDP hnuaiah climate change leh environment siam that dan tur te, Mizo pa lo neih dan tihtawp leh thingphun uar te chu a dah pawimawh hle a ni, a ti a. Tuna climate change chungchanga inzirtirna leh training ang hi Mizoram District tinah pawh neih chhunzawm nise a duh thu a sawi.

Khualzahawm Planning Minister Pu Lalsawta pawhin thusawiin khawvel sik leh sa leh khawchin danglam chak ta lutuk chu tihtakzeta bei a ngai tawh a, mitin a nghawng phak avangin mawhphurtu kan ni vek a ni, a ti. Mizoram chhung ngeiah pawh buh leh thlai thatna thin hmunte chu a inthlak zel a, natna hri kan hriat ngai lote pawh a rawn hluar tan hial a ni, a ti bawk. Climate change chungchanga sorkar hmalak dan tur nasa taka ngaihtuah a nih mek laiin mithiam ten hemi chungchanga sorkar hotu lute leh official-te zirtirna hun an rawn neihsak theih chu a vanneihthlak takzet a, a theih anga zauvin mipuite hrilhhriat zel a, sorkar leh mipuite tangruala hmalak zel a tul dawn a ni, a ti. 

Planning Secretary Dr.C.Vanlalramsanga chuan nikum 4th November, 2016 khan khawvel ram hrang hrangte chu climate change laka invendan tur atana hmalakna ‘Paris Agreement’ an siam a, amaherawhchu kum khat hnuah pawh a tak taka rampum anga climate change programme nei chu thei chu ram 1 - Morocco - chiah a nih thu a sawi a; ram dang USA, China, Russia, Japan te pawh climate change plan tha nei lo zingah an la tel zel a ni, a ti bawk. India  ramah chuan Prime Minister hlui Dr.Manmohan Singh  kaihhruaina hnuaiah climate change chungchanga hmalak dan tur rel a ni tawh a, chung zinga hmalakna pawimawh tak pakhat chu ‘Indian Himalayas Climate Adaptation Programme’ hi a ni a, UNDP nen tangkawpin India state hrang hrangah training leh ruahmanna siam dan tur inzirtirna kalpui mek a ni, a ti bawk.

Vawiin Climate Change Orientation Programme Level 1-ah hian Dr.Mustafa Ali Khan, Team Leader, IHCAP, Swiss Cooperation Office, Embassy of Switzerland, India chuan climate change laka inven dan tur leh hmachhawn dan turah IHCAP chuan India sorkar nen an thawhho thu a sawi a. Mizoram-ah pawh hma rawn la zelin kum 3 chhung vel chu a theih anga tam training leh a tul ang anga hun hmang turin state sorkar nen an thawkho tur thu a sawi bawk. Climate change avanga Mizoram boruak, sik leh sa, thlai leh thing danglam dan chungchang chu Chief Scientific Officer & Member Secretary, MISTIC Dr.R.K.Lallianthanga, Addl PCCF & Nodal Officer (Climate Change), Dept of Environment & Forests Pu K.Kire, IFS leh Technical Adviser (CC&C), UNDP Dr.Sachinanda Satapathy ten presentation an nei a ni.