Cricket Association of Mizoram (CAM) chuan vawiin khan an President Pu Lal Thanhawla, Chief Minister kaihhruaiin Hawla Stadium, Republic Vengthlangah General Body Meeting cum Election an nei.

CAM President Pu Lal Thanhawla chuan Mizorama sports discipline dang lian tak takte aia cricket chu bultan tlai ni mahse game a tui ten thahnemngai taka mahni sum leh pai pawh sen ui miah lova tha an kalpui chhoh tawh a nih thu leh, hmasawnna hmuh tur a awm chho zel chu lawmawm a ti a. Member-te thahnemngaihna chungah lawmthu sawiin, Board of Cricket Control of India (BCCI) affiliation nei tura hmalak chhunzawm zel a nih thu a sawi a. Pu Lal Thanhawla chuan cricket game chu discipline tha leh hmalam hun eng nei tha, Mizo thalaite thiam chi leh eizawnna tlak a nih avangin uar chhoh deuh deuh a tul a ni a ti a.

Meeting hi thuang hnih a kalpui niin, hun hmasa zawkah hian General Secretary leh Tresurer-te hnen atangin pawl chetvelna leh sum dinhmun report ngaihthlak a nih bakah rorelna neih zui nghal a ni a. An thu ngaihtuah zingah Technical Rules ennawn chungchang te, player registration mumal zawk nei tura hmalak te, Affiliation neih theih veleh a BCCI inkaihhruaina zawm chungchang te, official record leh document mumal zawk neih chungchang te, Umpire leh Scorer hlawh tihpun te leh a dangte a tel. Session hnihna ah MJA kaihhruaiin kum 2018-2020 chhunga hruaitu tur thlanna neih zui nghal a ni.

CAM hnuaiah hian Full Member Club 14 leh Associate Member Club 13 an awm a. 2017-2018 Cricket Season chhung khan tournament pariat neih hman a ni a, Ramhlun Sporting Complex ah Indoor Practise facility siamin hna thawh mek a ni.

Attachment

  • Loading attachment...