Vawiin khan DC Conference Hall Mamitah Pu Bhupesh Chaudhary, IAS, District Bawrhsap / DDMA Chairman ni bawk hovin District Disaster Management Authority (DDMA) thutkhawm a ni.

Vawiin Meeting- ah hian kumin June 12 leh 13 a ruahtui tlak nasat avanga kan District chhung hmun hrang hranga chhiatna thlengte thlirho a ni a. Vanneihthlak takin mihring thi leh hliam an awm lo chu lawmawm an tih thu tarlan niin chutih rualin tuilianin in leh lo tam tak a chim bakah leiminin inkalpawhna kawngpuiah harsatna a thlen chu pawi an tih thu Meeting-ah hian tarlan a ni bawk.

Leimin avanga hmun hrang hranga kawng hnawh hi PWD leh Border Roads Organisation (BRO) te'n thianfaiin Silsury leh Hnahva inkar kawng leiminin a hnawh erawh NREGS sum hmangin VC te'n thenfai hna an thawk a ni. K. Sarali leh Kawrthah inkar kawng leiminin a hnawh tun thlenga thenfai la ni lo chu pawi an tih thu sawiin thenfai dan tur sawiho nghal a ni bawk.

Mamit District chhunga chhiatna thlengah hian Zawlnuam leh Silsury khuate hi a tuar na berte an ni a. Silsury-ah hian chenna in 45 chu tuiin a chimpil vek a, a vaia a chim pil loh hi in 29 a awm a ni. Zawlnuam Bawrai chhehvelah chenna in 20 tuilianin chimpil vekin a vaia tuiin a chim pil loh deuh hi in 50 a ni bawk.

DC/DDMA Chairman ni bawk chuan June Ni 15 khan Zawlnuam zone chhunga chhiatna thleng hrang hrangte a hmun ngeiah enin a tlawh a. Hei bakah hian State Disaster Response Force (SDRF) te chu Silsury-a tanpui ngaite tanpui turin tirh luh an ni bawk. SDRF-te hnathawh hi DDMA chuan lawmawm a ti a, Mamit Disaster zone hrang hranga mawhphurtute, BDO leh SDO (C) te chu tun tum chhiatna thlenga an thawh that avangin lawmthu sawi nan thuziak Letter of Appreciation pek ngei nise Meeting hian a ti bawk.

Mamit khawpui chhung Charkawn leh Bazarveng inkara leimin avanga harsatna thleng thin chu thlirho a ni a. Leimin vanga harsatna a thlen tawh lohna turin DDMA atangin a bul hnaia khawsate hnenah hian DM&R Act 2005 dan hnuaiah in bul hnaia tui paih mai mai lova, tuiluankawr tha tak siam tura Order pek nise tih a ni a. Hei bakah hian PWD Mamit Division-te'n Retention Wall siamna tura Estimate an siam a chu thlirho a ni bawk.