Statistics Day vawi 12-na chu vawiin khan Planning Minister Pu Lalsawta hovin Economics & Statistics Directorate Conference Hall, Aizawlah lawm a ni.
Pu Lalsawta chuan Statistics chu ram fing leh changkang apiangin a hlutzia an hria a, Mizoram pawhin statistics dik leh rintlak tangkaizia a hre chho zel a, sawrkar chauh ni lo mimal leh pawl dangte pawhin tangkai takin an hmang a ni, a ti. Mizoramin engnge kan tlak chham a, engahte nge phuhruk kan ngaihna lai hriat nan te, eng chenah nge hma kan lo sawn tawh tih hriat nan te, hmalak dan tur ruahmana siam nante data belhchiandawl neih a tangkai a, Statistics Department pawimawhna a lang zel a ni, a ti a.
Planning Minister chuan official statistics dik leh rintlak nei turin Economics & Statistics a thawktu a te ber atanga a lian ber thlengin anq pawimawh tiin an hna chan pual theuhah taima taka thawk turin a chah a ni. Planning Secretary Dr. C. Vanlalramsanga pawhin thu sawiin Statistics Day lo chhuah chhan, he ni hman tan a nih dan leh a pawimawhna te a sawi a. India rama statistics in hmun pawimawh tak a luah theih nana hmalatu, Indian Statistical Institute dintu Prof. Prasanta Chandra Mahalanobis-a pianchamah Statistics Day hi hman a nih thu sawiin he ni ah hian mipui mimir, a bik takin thalai zingah statistics pawimawhzia inzirtirna atana hman thin a nih thu a sawi.
Statistics Day hi ram pumah hman niin “Quality Assurance in Official Statistics” tih chu kumin thupui atan thlan a ni. Khuallian, Planning Minister Pu Lalsawta hian lehkhabu pahnih - Statistical Abstract of Mizoram, 2017 tih leh Annual Report of Births & Deaths Mizoram, 2017 te a tlangzarh nghal a. Statistical Abstract of Mizoram lehkhabu hi a parukna niin kum 2016-17 thlenga official statistics te dah luh a ni.
Statistics Day lawmna programme hi Economics & Statistics Director Pu Lalchhuanawma Hrahsel chuan a kaihruai a. Chawhnu lamah Quality Assurance in Official Statistics tih thupui sawihona neih niin sawihona hun hman a ni bawk.
