Vawiin chawhnu dar 2:30 khan Chief Minister Pu Lal Thanhawla hovin CM Cabinet Meeting Room-ah NLUP Implementing Board, Art & Culture Department leh Mizoram Cultural Organization (MCO) te chuan Cultural Festival buatsaih chungchang an sawiho. He meeting-ah hian Art and Culture Minister Pu R. Romawia leh I&PR Minister Pu Lal Thanzara an tel bawk a ni.

Chief Minister chuan sawihawnna neiin, hnam inpumkhatna tichak theitu Cultural Festival buatsaih tur a hmalakna awm chu lawmawm a tih thu a sawi a. State thenawm ten kût hrang hrang an lawm danah an Pipu hun lai atanga an hnam kalphung leh ziarang, tunlai changkanna in a pawlh dalloh entira pholan thin a nih thu sawiin, Mizoramah pawh cultural kaihhnawih festival buatsaih thinah te mahni culture a tha lai apiang chawi nun chu tha a tih thu a sawi a: thangtharte tan inzirna a nih dawn bakah hnamdang ramdang miten min hriatchian leh zualna a nih tur thu a sawi.

Vawiin meeting-ah hian Zohnahthlak zawng zawng huap Cultural Festival pui tak buatsaih ni se tia rel niin, he kût pui lawm tura sum mamawh tur te sawiho a ni a. Art& Culture Department chu bultum tum ruat an ni a, Festival lawm dan tur ngaihtuahtu tur Committee din ni bawk se tia rel a ni. Hun remchang hmasa leh berah inhmuhkhawm leh a, kût neih hun tur te sawikhawm leh tur a ni.

Cultural Festival buatsaih chungchanga meeting neihah hian Pu P.L. Thanga, Member Secretary, State Planning Board & Vice Chairman, NIB; Pu James Lalrinchhana, Secretary, NIB; Pu R. Hmingthanzuala, Director, Art & Culture Department te leh NIB leh Art & Culture atanga official dangte bakah MCO Office Bearer-te an tel a ni.