Lunglei District leh Lawngtlai District huam chhunga Oil Palm chinna hmun leh nursery-te a hmuna tlawh tur leh Oil Palm chingtute dinhmun zirchiang turin Mizoram Legislative Assembly hnuaia Committee peng pakhat Subject Committee III member-te chu an Chairman Pu R. Vanlalvena hovin vawiin tlai khan Lunglei an lo thleng. Subject Committee member lo kal te hi Pu R.L Pianmawia, Pu K. Lalrinthanga leh Pu Lalthanliana te an ni.  Subject Committee III te hi Pu J. Lalzamliana, Director, Agriculture Department, Pu C. Lalthlamuana, Deputy Director, Agriculture Department, Pu B. Ramnunsanga, Subject Matter Specialist (Agronomy), leh Pi Lalnunpuii Renthlei, Under Secretary ten an rawn tawiawm a ni.

 Subject Committee III te hian Lunglei Circuit House Conference Hall-ah vawiin tlai khan an Chairman Pu R. Vanlalvena kaihhruaina hnuaiah Lunglei District huam chhunga Oil Palm chingtu mi sawmnga (50) rual te inkawmhona hun an hmanpui. He meeting-ah hian Lunglei Bawrhsap Dr Ankita Chakravarty, IAS, Lunglei Additional DC Pu Benjamin Lalzama, MCS leh Lunglei DAO Pu Lalnithanga te an tel.

Meeting kaihruaitu Pu R. Vanlalvena chuan Oil Palm chingtute tana Agriculture Department hmalakna te, a chingtute dinhmun leh harsatna tawh hrang hrang te zirchianga enfiah tur leh hlawk zawka an tharchhuah theihna tura tanpuina an mamawhte sawiho tura lo kal an nih thu a sawi a. Spot Visit an neihnaa an thil zir chu sawrkarah an la thlen leh tur thu a tarlang bawk. Lunglei leh a chhehvel khaw pakua (9) atanga oil palm chingtu kalkhawmte chuan an mamawh hrang hrang leh harsatna tawhte lo thlenin Oil Palm enkawl dante leh a hralhna chungchanga hma lak dan turte sawihona hun tha tak an hmang.

 Subject Committee III te hian naktuk 9^th May, 2018 hian Spot visit an neih dawn bakah W. Rotlang leh Phairuangkai ah te Oil Palm Nursery an tlawh ang. 10^th May 2018 (Thursday) hian Lawngtlai District panin an kal ang.