Vawiin tlai dar 3:00 khan School Education Directorate Conference Hall-ah Samagra Shiksha Abhiyan Annual Work Plan & Budget 2018-19 thlirho a ni a. School Education Minister – Pu H. Rohluna’n he hun hi a hmanpui.

Samagra Shiksha Abhiyan meeting hmasa berah hian Minister chuan thu sawiin zirna atana tangkai tur thil chi hrang hrang a lo chhuak zel a. Tunah pawh scheme awmsa pathumte chu Samagra Shiksha Abhiyan scheme hnuaiah an lo awm dawn tih sawiin, he scheme thar hi thawktute inpekna avangin tha taka kalpui theih a beisei thu a sawi a. Pu H.Rohluna chuan kan ram zirna siam thatna kawngah theih tawp chhuah tlang zel turin meeting a telte a sawm a ni.

School Education – Commissioner & Secretary Pi Esther Lal Ruatkimi chuan Central atanga scheme lokalte chu bawhzui that a tul thu a sawi a Data leh reportte pawh a hun taka pek a tul thu te, scheme thar atana Central-in min pek theih tura ruahman chu vaibelchhe 208.29 anih thu a sawi bawk.

School Education Department – Director Pu K. Lalthawmmawia leh SCERT Director Pi Laldawngliani Chawngthu te pawhin he scheme thar atana inbuatsaihna leh hmalakna te an sawi bawk.

Samagra Shiksha Abhiyan hi School Education tana Integrated Scheme thar a ni a. Tun hmaa scheme hrang hrang SSA, RMSA leh SCERT hnuaia Teacher Education-te chu he scheme hian a huam dawn a, a hrang theuha kal tawh lovin hlawm khatah dah an ni. Annual Work Plan & Budget a hrang theuha an siam thin pawh hlawm khatah siam vek a ni ta a. Samagra Shiksha Abhiyan hian kumin atang in heng scheme pathum ni thinte hi scheme khatin a kalpui dawn a ni.

He meeting-ah hian School Education Minister bakah Commissioner & Secretary Pi Esther Lal Ruatkimi, Director Pu K.Lalthawmmawia, School Education Department Officerte, SCERT Director leh Officerte, SSA leh RMSA Officer leh Staffte an tel a ni.