Vawiin khan Chief Minister Pu Lal Thanhawla hovin Mizoram District 8 a Deputy Commissioners leh Superintendents of Police te nen Chief Minister’s Conference Hall-ah an thukhawm a, District inrelbawlna chungchang chipchiar takin an sawi ho.

Chief Minister chuan DC leh SP te chu an District huamchhunga sorkar aiawhtu leh mawhphurhna sang tak kengkawhtu an ni a, mipuiin an lakah beiseina sang tak an nei a ni, a ti. Sorkar chuan ram mipuite hamthatna tur Welfare Scheme chi hrang hrang a duang a, heng hamthatna hian an rawngbawlsak mipui te hnen a thleng ngei tur a ni tiin Scheme hrang hrang an kalpui te a hlawhtlin theih nan veng leh khaw hrang hranga tlawmngaipawl hruaitu te, mipui thlan Village Council te thawhhopui thiam turin a chah bawk. Chief Minister chuan mipuiin State sorkarah beiseina nasa tak an nghat a, mipui te beiseina tihlawhtling tur chuan District tina sorkar inrelbawlna kengkawhtu lu ber an nih angin DC te leh SP ten mawhphurhna sang tak an neih thu leh chu an mawhphurhna zo taka kengkawh tur chuan thahnemngai taka an thawh a tul a ni, a ti.

Chief Minister chuan Corruption dona kawngah sorkar chuan theihtawpa hma a lak thu sawiin ACB pawh thuam chak a nih thu leh IGP rank Police Officer enkawlna hnuaia dah a nih thu a sawi a. An District huamchhunga Corruption a bo theih nan DC leh SP te chu ACB hi chhawr tangkai turin a fuih a. Pawikhawihna thleng thin pawi a tih thu sawiin ruk ruk, tualthah, pawngsual, mahni intihhlum leh suahsualna chi hrang hrangte a rem theih nan tan tlan a tul a, Mizoram chu ram ralmuang a nih reng theih nan theihtawp chhuaha tan lak hi kan tihmakmawh a ni, a ti bawk. CM chuan 12th Five Year Plan kan luh chho tawh dawn avangin ram hmasawnna tur Plan mumal tak siam a nih theih nan DC leh SP ten ngaihtuahna thar nen rawtna te rawn siam turin a chah bawk a. Lungleiah chuan Planning lam ngaihtuahtu High Powered Committee a awm thu leh chutiang ang rawng kai chuan District tinah District Planning Committee hnathawk thei a dah a tul thu sawiin, he Committee in hna a thawh theih nan a tul anga Approach Paper buatsaih a, Finance Minister hnena thehlut turin a chah a ni. Inthlang ram kan nih angin DC te leh SP te chu an District huam chhunga mipui thlan Autonomous District Council member te leh Village Council member te zah taka dawr a, inrem taka thawkho turin a chah bawk a. An enkawlna hnuaiah mipui te an himin an thlamuang tur a ni a, sorkar in thil tha a ruahman zawng zawng te hi mipui te hnen a thleng ngei tur a ni, a ti.

Meeting on District Administration hi nilenga neih a ni a. Deputy Commissioner ten an District dinhmun tlangpui, Department hrang hrang hnathawh dan te, Centrally Sponsored Schemes an kalpui dan te, Mizoram sorkar Flagship Programme NLUP kalpui dan te leh an hmachhawp te, an District huamchhunga dan leh thupek kenkawh lama an hmalakna hrang hrang te Chief Minister an hriattir a. District inrelbawlna kawnga an hmalakna, hmachhawp leh harsatna te pawh an sawi ho zui nghal a ni.

Vawiin meeting-ah hian Finance Minister Pu H Liansailova, Parliamentary Secretary Pu Lal Thanzara, Chief Secretary Pu Van Hela Pachuau, Finance Secretary Pu Lalmalsawma, DGP Pu Lalrokhuma Pachuau, Secretary to CM Pu Lalramthanga, GAD Secretary Pi Renu Sharma leh official pawimawh dang te an tel a ni.