Vawiin khan Kolasib DC Conference Hall-ah Special Summary Revision of Electoral Rolls chungchang ngaihtuahin meeting neih a ni. Pu Lalchungnunga, SDO (S), ERO Kolasib A/c nibawk chuan a kaihruai a ni. Thu hma sawiin Roll Revision neih leh tura mipui ten kan tih tur kan tih theuh a tul thu a sawi a. Roll a inthun lut tur te, hming belh leh paih ngai leh siam that ngaite chu a hun bituk anga ti zel turin mitinin tan i la ang u, a ti a ni.

Pu JH Lalrimawia, Election Officer pawhin thu sawiin Roll Revision neihah hian a tlangpuiin hming thun luh thar tur kan buaipui hle thin a. Hming paih ngai, pem avang emaw, thi emaw an awmin kan buaipui hle bawk tur a ni, a ti a. Roll hi uluk taka kan buaipui a tul rualin voter te pawhin dik taka vote kan thlak a, tihsual leh vote thlak nawn thu ah jail tan theihna hial a tling tih kan hriat a tul a ni, a ti.

Roll Revision meeting ah hian Kolasib khaw chhunga Political party hrang hrang aiawh te, NGO hruaitu te, zirlai aiawhte leh Media aiawhte an tel tha hle a. Revision neih dan tur hun bituk leh tih turte inhrilhhriat a ni. Meeting-ah hian political party te chu theih tawp chhuaha roll ennawnna chungchanga sorkar puibawm tura ngen an ni a. A hun bithliah chhunga tih tur tulte ti a, Roll a chuang tur 1st January, 2012 a kum 18 tling zawng zawngte chu ziahluh vek an nih ngeina tura tanlak a tul thu pawh sawilan a ni.

Kolasib District pumpuiah hian A/Constituency 3 awmin polling station 76 a awm a. A zavaiin voter tun dinhmunah hian 47,278 an awm mek a ni.

Meeting ah hian Vairengte SDO & AERO Pu K. Lalrohlua leh Kawnpui SDO & AERO Pu Darduna te pawhin thu an sawi bawk a ni.