Pu Zodintluanga, UD&PA Minister chuan, “Aizawl Municipal Council a Councillor-te in tanrualna leh thawhhona hian AMC hmakhua atan nasa takin kawngro a su a. Tanrualna hian zahawmna leh chawimawina min khumtir a; zahawmna hi phut chhuah ni lovin a phute chuan an hlawhchhuak zawk thin a ni” a ti. Pu Zodintluanga hian vawiin chawhnu dar 2.00 khan AMC office, Thuampui-ah AMC official website a hawng a; he website hi a duh apiang tan amcaizawl.mizoram.gov.in ah tlawh theih a ni.

Hawnna thu sawiin Minister chuan, “AMC website hian kan hnathawh leh ruahmannate bakah kan nitin inrelbawlna kawngah langtlang kan nihzia a taka a entir chuan mipuite rin kan kai lehzual dawn a; kan phak ang tawk zela tiphuisui chhunzawm tura tanlak a tul bawk ang” a ti. Sawrkar chuan Mizoram khawpui dangah pawh municipal council din chungchangah ngaihtuahna a sen thu sawiin, “AMC hi a hmasaber a ni a, naupang piang hlim angin kal kan zir mek a, khawpui danga municipal council din belh chungchang pawh hi kan seilen  dan hian kawngro a su thui viau dawn a ni” Pu Zodintluanga chuan a ti a. Mizoram sawrkarin AMC Councillor-te hlawh, dinhmun leh an mawhphurhna turte pawh zir chiangin, awmze nei tura mawh inbel dan tur pawh ruahman chhoh a nih thu Minister hian a sawi lang bawk.

Vawiina AMC official website hawnna inkhawm hi Pu C.T, Zakhuma, AMC Chairman chuan a kaihruai a; Pu Lalzirliana, Executive Councillor chuan website siam a nih chhan leh hmachhawp an neihte a tarlang. Pu Nghaklianmawia, Chief Executive Officer, AMC chuan lawmthu sawiin inkhawm a khar a ni.