Mizorama Green Mizoram Day hmanna pui ber chu Chief Minister Pu Lal Thanhawla leh Chairman, State Level  Committee on Green Mizoram ni bawk hovin Thenzawl ah hman a ni a. He Ni lawmna puala inkhawm Thenzawl Joint YMA Hall a neih chu Khuallian niin a hmanpui.

Vawiina Green Mizoram Day hmannaah hian Environment, Forests & Climate Change Minister Pu Lalrinmawia Ralte;  AH & Vety. Minister Pu Ngunlianchunga; Fisheries leh Sericulture Minister Dr. BD Chakma; Parliamentary Secretary Pu K.Lalrinthanga; Parliamentary Secretary Pu Joseph Lalhimpuia; Chairman, Mizoram State Women Commission Pi Vanlalawmpuii Chawngthu; Chief Secretary Pu Lalmalsawma leh DGP Pu Lalthianghlima bakah Sawrkar mi pawimawh leh Thenzawl mipuite an tel a. Green Mizoram Day pualin Thenzawl a AH & Vety Complex, World Bank Road a he ni puala thing phunna hun 'Ceremonial Planting'  neihah Chief Minister leh Sawrkar mi pawimawh ten thing tiak an phun a ni.

Chief Minister Pu Lal Thanhawla chuan kumina Green Mizoram Day thupui 'Thing phun la, boruak thinghlim siam rawh' tih chuan thing phun la, hrisel rawh tih lam pawh a kawk tel thu sawiin Mizoram in industry lian te neilo mah ila, lirthei a tam tawh a, heng lirthei khu te hian boruak chhia an pe chhuakin, kan hriselna te an nghawng a, thing phun kan uara, kan enkawl zui hian boruak kan tih thianghlim mai bakah kan hriselna atan thil tha kan ti tel a ni, a ti a. Ramsa, chungleng sava leh lui dunga nuncha te humhalhna kawnga kan thanharh chu Sawrkar leh hnam ang pawhin lawmawm atih thu sawiin thalai ten silai nilo, camera nen a nungcha leh sava vehna chang an hriat hi changkanna zia a ni a, a lawmawm hle a ni, a ti a. YMA leh khawtlang ten theihtawp chhuah a nungcha an humhalh laiin mi thenkhat, kuthlei ten ramsa leh sava an veh leh an suat thin chu a vanduaithlak a, hetiang tih ching hi Sawrkar leh khawtlang in ka zuah loh a pawimawh a, chu mai bakah an pawi khawihna phu ang hremna an hmuh ngei theih nan kan tan tlan a pawimawh a ni, a ti bawk.

Pu Lal Thanhawla chuan thing leh mau te hi Pathian siam an nih angin duat leh dim taka enkawl hi mihringte tih tur dik tak anih thu sawiin kan ramngaw te kan tih chereu zel chuan kan ram hi thlalerah kan siam ang tih a hlauhawm a, kan chhuan lokal zel turte hmakhua ngaihtuahin leh an anchhia kan hlawh loh nan,  thing phun kan uar a, kan phunsa te a dam khawchhuah theih nan theihtawpa enkawl leh vilzui hi kan tih tur dik tak a niin kan mawhphurhna lian tak a ni theuh a ni,a ti a. Sawrkar leh mipui zah lova lo hal leh vat thin ten kawngpui thleng thlenga lo an vat leh kawngsira thing phun lian tha tak tak mai an hal hlum thin chu bansan a hun tawh tih thu sawiin hengtiang tih ching hi engtia hrem tur nge an nih tih kan ngaihtuah loh chuan kan thing phunte hian tangkaina an nei lovang tih a hlauhthawnawm a ni, a ti.

Chief Minister chuan thing phun belh, ram ngaw zau belh zel, ram humhalh leh ram kang ven chu Sawrkar mawh chauh a ni lova, kan zavai mawhphurhna leh kan tihtur a ni tih kan hriat thar a pawimawh a ni,a ti bawk a. Mizoram mipui zawng zawng te in siam thar a, tlawmngai pawl leh Kohhran hrang hrangte nen tang tlanga thing phun leh enkawl zuina lamah tan la turin a sawm bawk a ni.

Chief Minister hian kangmei venna kawnga District ti tha te; Serchhip District huam chhunga  khaw ti tha leh Serchhip District a kangmei venna kawnga chanchinbu leh Cable TV ti tha te leh School leh Department thing phun tam te hnenah lawmman a hlan. Kangmei venna kawnga ti tha ber chu Mamit District niin, pahnihna chu Serchhip District a ni a, pathumna chu Lunglei District a ni a. Serchhip District-a kangmei venna kawnga khaw ti tha ber chu Chhiahtlang niin, pahnihna chu Leng a ni a, pathumna chu Buangpui an ni a. Heng lawmman te hian thuziak, trophy leh pawisa fai a keng tel.

Khualzahawm Environment, Forests & Climate Change Minister Pu Lalrinmawia Ralte chuan hmun kilkhawr leh khaw te zawk ten kawngsira thing phun lian leh nung tha tak tak an neih laia khawpui zawk ten'a kan thingphun a thi duh bik hi kan ngaihtuah chian a ngai a, a enkawl zuina lamah tan kan lak a ngai a ni a ti. Green Mizoram avanga Mizo ten thing phun ka uar a, Mizoram kan tih hrin belh zel chu lawmawm a tih thu a sawi bawk.

He hun kaihruaitu Principal Chief Conservator of Forests Pu Lalram Thanga chuan khawtin an khaw puala ramngaw reserve an neihsa te humhalh a, neih belhna kawnga ngaihtuahna an sen a, thing phun mai duh tawk lovin a enkawl zuina lamah tan lak a pawimawh thu a sawi.

Pu Lalthangliana Murray, Chief Conservator of Forests chuan Green Mizoram Day chungchanga report tlangpui a tarlang a. A report ah hian hmun hrang hranga hun hmasa lamah Green Mizoram Day puala thingphun te dinhmun a tarlang bawk a ni.

Vawiina Green Mizoram Day hmanna hi a tum 17-na a ni a. Kumina Green Mizoram Day thupui chu 'Thing phun la, boruak thianghlim siam rawh' tih a ni. Nikum huam telin, Green Mizoram Day pualin Mizoram hmun hrang hrangah  thing tiak nuai 44 chuang phun a ni tawh a ni.

Environment, Forests & Climate Change Department tarlan danin Mizoram ah hian ram ngaw 'forest area' square kilometre 4483.29 a awm a, field staff hnathawk 493 an nei a. Department in a chhut danin reserve forest bikah chuan staff pakhatin square kilometre 9.42 zau forest area an enkawl leh an vil a ngai thin a ni.

Nikum khan Mizoram pumah ram kang 2468 awmin chuta tanga 2351 chu lo hal vanga thleng a ni a, lo halin ram a tihchhiat hi hectare 3554.65 a ni a. Kuminah hian ram kang a tlahniam a, ram kang 1625 a thleng a, heng zinga 1323 chu lo hal vanga thleng a ni a, ram tihchhiat hi hectare 4171.09 vel nia chhut a ni.