Vawiin khan Lawngtlaiah Green Mizoram Day hman a ni a. Chawhma dar 11-ah DC office tualah a hawnna inkhawm buatsaih niin, Lawngtlai District Additional DC Pu R.Lalsangluaia chu Khuallian a ni.

Khuallian chuan thing chu boruak tithianghlimtu leh nunna hnar pawimawh tak a nih avangin phun uar deuh deuh a tul thu a sawi a. Phun maia duh tawk lova tha taka enkawl zui a pawimawh thu sawiin, phun tam ai chuan a nung tam leh tam loh chu a hlawhtlinna hriltu zawk a ni, a ti. Sum leh pai deh chhuah teuh ai pawha pawimawh hmasa chu ramngaw humhalh leh siam belh a ni tiin, a tichereu zawnga khawsa lo tur leh kangmei venna lamah pawh theihtawpa inhmang turin kal khawmte chu a sawm nghal a ni.

Kumin Green Mizoram Day-ah hian "Thing phun la, boruak thianghlim siam rawh," tih chu thupuiah hman a ni a. Hawnna inkhawm hi Deputy Conservator of Forests (Wildlife) Pu PC Lalchhandama'n a kaihruai a. Ani hian Lawngtlaia Green Mizoram hman tawh dan sawiin, Village Level Fire Prevention Award 2016 dawngtu khua a puang nghal a. Lawmman hi Khuallianin a hlan nghal bawk.

Village Level Fire Prevention Award 2016 lawmman pakhatna hi Bualpui 'NG'-I-in an dawng a; pahnihna chu Bungtlang 'S'-I niin, Sangau-II chu pathumna an ni.

Hawnna inkhawm neih zawh hian LADC-a DCCF Pu K.Lalromawia chuan thing tiak phun tur semin, sawrkar department leh tlawmngai pawl hrang hrangte'n an thing phunna hmun tur lam an pan nghal a. Thing hi Bethel tawngtai tlangah te, helipad panna kawng leh Lawngtlai khawpui chhung kawng sir dung remchang laiah te phun a ni a; department leh sikul thenkhat anmahni ram chhunga phun an awm bawk. Vawiin hian thing tiak 320 vel phun a ni.

Green Mizoram Day hi a tirah chuan Green Aizawl tiin kum 1998 khan Aizawlah hman tan a ni a. Kum 1999 atangin Green Mizoram tih hming chawiin ram pumah hman a ni. Lawngtlai District bikah chuan kum 2000 atang khan hman tan niin, kum tin hman a ni a. Thing tiak 17184 phun tawh zingah 8141 chu nungin, za zelah sawmli pasarih (47%) nung ang a ni.