Nimin tlai dar 3:30 PM khan Chief Minister Pu Lal Thanhawla hovin a Pisa-ah Kawnpui-Hortoki kawng chungchang sawiho a ni a, rang taka hmalak anih theih nan thil awm te thlir hovin ruahmanna duan chhin a ni. He meeting ah hian Parliamentary Secretary leh Tuirial bialtu MLA ni bawk Pu Hmingdailova Khiangte; PWD Engineer-in-Chief Pu R. Vanlaltluanga leh PWD hotulu dang pathum te; Kolasib DC Pu H. Lalengmawia, Kolasib SP Pu C. Lalzahngoa bakah Northeast Frontier Railways engineer pathum te an tel a ni.

Chief Minister Pu Lal Thanhawla chuan rel kawng sial mek hna hi Mizoram Sawrkar chuan a ngaipawimawh a, he project hi Mizoram tan mai nilo rampum tan project pawimawh tak a ni a, hma taka he project hi zawh anih theih nan theihtawp chhuah mek a ni a, chutih rualin hna kal lai mek avanga kawng chhia in Hortoki mipui tan harsatna a thlen hi kan ngaihtuah tel a ngai a, rel kawng sial hna tikhaihlak lova he kawng thuam thata mipui te harsatna ti kiam zawnga ruahmanna siam anih theih nan he meeting hi koh a ni a, inpuhmawh lovin enge tha ber ang tih kan ngaihtuah tlan a ngai a ni, a ti.

Meeting ah hian Pu Hmingdailova Khiangte chuan he kawng dinhmun leh mipuiin harsatna an tawh dan te chipchiar takin a sawi a. Kolasib DC Pu H. Lalengmawia’n Railway aiawhte nen hemi chungchanga meeting neih tawh leh hma lakna lo awm tawh te sawiin Railway ho hma lakna chu a beitham tih a sawi a. Railway aiawhte chuan fur laia an tan duhthusama kawng khuar hnawh leh kawng thuamthat a harsa chungin a theih ang angin hma an la a ni, an ti a. He kawng hi kum 3 tal chu rim taka hman a ngaih dawn avangin kawng hi thuamthat a pawimawh dawn thu te, an estimate ah kawng repair emaw, kawng thuamthat emaw a tel loh avangin kawng thuamthat thu a an tan tun maia thil tih a harsat thu te sawiin he kawng atana estimate chu PWD in siam sela tiin chu chu an hotu sang zawk hnenah bawhzui an in tiam a ni, he thilah hian an hotu sang zawk te pawh an inhawn hle an rin thu an sawi bawk.

Meeting chuan a rang thei ang berin Railway-in he kawng an hman chin hi a khuar lai leh a chhe zual bik lai chu siam tha turin leh an hman chhung chu helai chin hi enkawl zui se an ti a. Repair hna an kalpui dan hi District Administration thuneitu ten vil se an ti a. Railway in a an hman loh chin kawng hi PWD in a thuamthat hna, fur zawh ve leh tan nghal se tiin an rel bawk.