Vawiin khan Chief Minister Pu Lal Thanhawla’n Mizoram a mimal sikul neitutu inzawmkhawm pawl intawhkhawmna Mizoram Independent Schools Association (MISA) Meet 2016 chu khuallian niin a hmanpui a. He hun hi Pi Lal Riliani, President, Indian Tobacco and Health, Mizoram Chapter leh Rev. Dr. Lalchungnunga, Chairman, Mizoram Board of School Education (MBSE) ten khual tha Special Guest niin an hmanpui bawk a ni.

Chief Minister Pu Lal Thanhawla chuan India ram pumpui ngaihtuahin sikul leh zirna in tha leh ngaihsan awm te chu private emaw, Kohhran emaw tena an enkawl anih thu sawiin Mizoramah pawh private sikul te hian nasa takin zirna rawngbawl hna an kalpui mek a, Mizoramah pawh kan sikul chhuanvawr ber berte chu private sikul te an ni a, hei hian an pawimawhzia a entir a ni, a ti. Mi thenkhat ngaihdana private sikul chu sumdawnna maia ngai an awm a, mahse an result tha hian chutiang rilru an put loh zia hi a lantir a ni, a ti a. Sawrkar leh private sikul te tehkhin fo ani thin a, sawrkar sikul a zirtirtu ngei te pawhin an fate kalna atan chuan private sikul an thlang thin a, hei hian private sikul te kalphung leh zirna an kalpui dan thui tak a hrilh em aw tiin ngaihtuahna min siam tir thei a ni, a ti.

Zirtir hna chu hna ropui leh zahawm leh zirna in a tum ber chu naupangte puitling hmantlakah leh khua leh tui thaa chhuah tir anih thu sawiin Chief Minister chuan zirtirtu te file chu an naupang zirtir a te an ni a, hei hi khawvel file-ah chuan file pawimawh ber a ni, a ti a. Kan mihring anpuite enhran chu Pathian in a duh loh berte zing ami anih thu sawiin Pu Lal Thanhawla chuan he huna zirtirtu kalkhawmte chu an naupang enkawl leh zirtir te chu enhrang lova, an chawrchhuahna dinhmun te ngaihtuah lova angkhata en a, mi tangkai, rinawm, taima leh Pathian tihna kawngah te an chhuah theih nan theihtawpin zirtir hna kalpui turin a fuih a. Zirlai naupangte tan entawntlaka an awm a pawimawh thu sawiin faina leh thianghlimna kawngah te, incheina kawngah te, naupangte tana role model nih hi thil pawimawh tak a ni, a ti.

Chief Minister chuan private sikul fee chungchangah Sawrkarin thu nei chiah lo mahse an fee hi mipui tan phurrit ni lova mi harsa zawkte hmakhua ngaihtuah chunga sikul neituten inpuahchah se tiin a duh thu a sawi. Right to Education hi dan anih tawh avangin he dan hnuaia mi harsa zawk fate pawhin heng sikulah an luh thei dan remruatna tha tak siam chu ram leh hnam tan pawh thil pawimawh tak anih thei thu a sawi a, sikul bansan tehfung drop-out rate tihhniam zel nan private sikul leh Sawrkar nen thawhhona tha tak neih a pawimawh thu te pawh a sawi a. Zirna in thenkhat leh mimal ten zirlai naupangte tan hostel an buatsaih thin chu sumdawnna maia ngai lovin hostel enkawlna dan sawrkarin a siam chu zawm a, he dan kan neih hi rahbi thar a ni tih hriaa kan zawm tlan hi kan zavai in hmakhuana ani tih kan hriat a ngai, a ti bawk.

Chief Minister chuan Private sikul leh Sawrkar inkara thawhhona kawng hrang hrang dapa, remruatna tha siam a pawimawh thu sawiin thawhhona tha nei turin hma lak kan tum dawn a ni, a ti a. Act East Policy leh insumdawntawnna chungchang sawiin Chief Minister chuan he thil hi kan dawnsawn thiam nan tun atanga zirtirtute pawhin kan zirlai naupangte ngaihtuahna buatsaiha, an rilru siam rem nan inbuatsaih a pawimawh thu a sawi.

MISA Meet 2016 ah hian Pi Lal Riliani, President Indian Society on Tobacco and Health Mizoram Chapter chuan zuk leh hmuam in hriselna a nghawng dante sawiin ei leh inah te fimkhur a tul zia te, taksa sawizawi pawimawhnate leh ei leh in tur tha thlan thiam a pawimawh zia te a sawiin hun a hmang a ni.

Vawiin programme ah hian MISA in Chief Minister’s Relief Fund atan cheng singhnih (20,000) Chief Minister hnenah an hlan nghal a ni.

MISA Meet 2016 hi Pu Lalthlamuana Hnamte, President, MISA in kaihruaiin Presidential Speech a sawi a, a thusawi hian private sikul leh sawrkar sikul dinhmun te a tarlang a, Pu Lalsawmzuala, General Secretary, MISA chuan hmelhriattirna hun hmangin a hnenah atangin Report ngaihthlak a ni.

Mizorama private sikul ah hian zirlai naupang 1,39,127 an awm mek a, zirtirtu 7563 thawk an awm a, support staff 2500 bawr vel an awm bawk a ni.