Vawiin khan Chief Minister Pu Lal Thanhawla hovin Home Minister Pu R.Lalzirliana, Finance Minister Pu Lalsawta, UD&PA Minister Pu Zodintluanga, NIB Chairman Pu J.H.Rothuama, NIB Vice Chairman Pu P.L.Thanga te bakah Champhai D.C leh department pawimawh te chu Kelkang khaw chhawmdawlna tur leh Harhna chhimtu mipui te awlsamna tura hma lak nghal tur pawimawh te ngaihtuahin NIB conference hall-ah an thu khawm.
Harhna avanga chhimtu mipui thahnem takin hun rei tak Kelkang khua hi an chamchilh reng avangin eizawnna leh kawng hrang hranga mipui pun khawmna in harsatna a thlen mek te chu vawiina Chief Minister hova committee thukhawm chuan an sawi ho va. Kumin ah thlawhhma la mumal hman pawh an awm loh avangin khaw mipui te tana eizawnna tur ngaihtuah sak chu thil pawimawh hmasa ah ngaiin Bank-a NLUP sum pung atangin Kelkang khaw mipui te tan vawk leh ar vulh bakah petty trade hmanga eizawnna ngaihtuah sak ni se, tih a ni a. Eng trade mah thawk theilo te pawh Chhumchia scheme atanga tanpui tura tih a ni bawk.
Kelkang khaw mipui te tana eizawnna bakah hian mipui punkhawmna in mamawh leh harsatna hrang hrang a thlen te a rang thei ang bera sutkianna tur pawh ngaihtuah ho a ni a. Harsatna sutkianna turin hnianghnar zawka tui pekna tur te, inthiarna mumal zawk sakna tur te, bawlhhlawh thenfaina tur te, damlo te tana first aid damdawi leh thawktu duty indahna tur te, power supply leh school naupang zirna mumal taka kalpuina tur ten ruahmanna siam nghal a ni a. Heng ruahmanna te hi Champhai D.C. kaihhruaina hnuaiah bawhzui leh thawh ho tur a tih a ni.
Vawiina Chief Minister hova Committee thukhawm chuan lirthei chetsual theihna lakah mipui kan him tlan theih nan Kelkang pan tur leh haw lam pawh fimkhur tura ngenin motor neitu leh khalhtu te chu tlan chak lo turin a ngen nghal bawk a ni.
