Land Revenue and Survey Board chu vawiin khan Chief Minister Pu Zoramthanga hovin CM Cabinet Meeting Room-ah board hmalak dan tur sawihovin an thukhawm. Land Revenue and Survey Board-ah hian Chairman chu Minister for Land Revenue and Settlement Pu Lalruatkima niin, Vice Chairman chu Pu Rochhunga Ralte a ni.

Chief Minister chuan SEDP (Socio-Economic Development Policy) hnuaia leilung a innghat eizawnna (land-based economic activities) ngelnghet leh hlawk zawka kalpuina tur chuan land survey leh record mumal tak neih a tul avangin Land Revenue and Survey Board chuan mawhphurhna hautak leh pawimawh tak an chang a ni, a ti a. Member te chuan thahnemngai taka ruahmanna siam turin a sawm a ni. SEDP hnuaia mau emaw rubber emaw thildang chinna tur ram te rualkhai taka sem a nih theih nan te, a thawk tha duhlo an awm chuan lak let sak dan tur leh ram sem sa hralh chhawn mai mai a nih loh nan a ruahmanna siam chungchangte meeting-ah hian sawiho a ni.

Revenue Minister chuan state chhunga land pass hrang hrang neih chhinchiah danah felfai zawka kalpui a nih theih nan hmalakna siam mek te sawi langin, state dangin changtlung taka an lo kalpui tawh Digital India Land Record Modernization chu tunah bultan mek a nih thu te, sawrkar laipuia Department of Land Resources a an secretary in hemi chungchanga hmalakna enpui turin Mizoram a lo kal tur thu te a sawi.

Vawiin meeting-ah hian AMC Mayor Pu P.C. Lalhmingthanga, Adviser to CM Pu C. Lalramzauva leh member dangte an tel kim hle a ni.