Vawiin khan sawrkar laipuiin India ram zirna kalpui dan tur, Draft National Education Policy (NEP) 2019 a duan chungchanga inrawn khawmna leh sawi hona "Consultation Meeting" chu District Institute of Education and Training (DIET), Lawngtlaiah buatsaih a ni.

District Level Consultation Meeting-ah hian Lawngtlai District chhunga zirna lam buaipuitu department - DEO, RMSA, SSA, LADC Education Department, Lai Students' Association (LSA), Central Young Lai Association (CYLA), Primary School Teachers' Association (PSTA) leh Middle English School Teachers' Association (MESTA) ai awhte bakah, sawrkar leh private sikul ai awhte kal khawmin, Draft National Education Policy 2019 chungchang hi ngun taka zir ho a ni. 

He hun hi DIET Principal Pi Ngur Hming Liani Chinzah chuan kaihruaiin, Lawngtlai District-a he policy kalpui dan tura rawtna leh zir hona an neih tur chu uluk taka ngaihtuah chunga zir turin kal khawmte a chah a. DIET Lecturer-te'n powerpoint presentation hmangin sawrkar laipuiin he policy kalpui a tum dan te an sawi fiah a. Sawi hona hun hman zui nghal a ni bawk.

He policy hian Anganwadi atanga University thleng a huam dawn a. A tum ber pakhat chu kum 2025 hmaa India rama zirnain rahbi thar a kai theihna tur te, zirlaite'n ziak leh chhiar leh mathematics an thiam vek theihna tura hma lak te a ni. Policy kalpui dan tur hi district tinah mahni district dinhmun ngaihtuah chunga zir ho va, paih ngai emaw, belh ngai emaw a awm a nih chuan SCERT, Aizawlah rawtna theh luh leh tur a ni a. Chuti ang rawtna a awm chuan SCERT hian Central Committee for Draft National Education Policy hnenah a thlen chhawng ve leh dawn a ni.

He policy hi peih fel hman a nih chuan kumin 2019 kum tawp lamah chuan India ram pumpuiah hman nghal tura ruahman a ni.