Chief Minister Pu Lal Thanhawla kaihhruaiin vawiin khan Chief Minister’s Office Cabinet Room-ah Mizoram Institute of Medical College (MIMER) chungchang leh hemi behbawma thu pawimawh tak tak sawiho a ni. He meeting-ah hian Health Minister Pu Lal Thanzara a tel bawk.

Chief Minister chuan Medical College chu Mizoram leh a chhunga chengte neih ve atan thil tha, mipui tana tangkai tak tur a nih thu sawiin, chutihrual chuan nei tura buaipui chu thil hautak tak a ni, a ti a. A hlawhchham mai loh nan mawhphurtu sawrkar hnathawkte chu theihtawp chhuah turin leh, Medical Council of India (MCI) enfiahna hmachhawn leh thuai thei turin mahni chanpual theuh chak taka um turin kalkhawmte a hrilh a ni. Chief Minister chuan Medical College naran neih a hlauhawm thu sawiin, state dang leh ram dang mite hip thei tur khawpa standard tha neih tuma rilru siam tura chah in, ‘medical tourism’ lamah pawh ke pen ve theihna tur kawng a nih thu leh damlo refer na a sawrkar sum sen pawh engemawchen a hum theih tur thu a sawi. Damlo enkawltute hnathawh dan kalphungah Chief Minister chuan mipui rawngbawltu an nihna hre reng turin a chah bawk.

Vawiin meeting-ah hian MIMER leh MIC Inspection chungchanga kar hmasa lama thutkhawmna lo neih tawhin a thurel bawhzuina thlirho a ni a. Thawktu hrang hrang – teaching staffs, residents leh nurses, paramedics leh non-teaching staff dang la tura hmalak mek dan te, ICU leh ICCU, Blood Bank leh Lecture Hall siam dinhmun leh college mamawh khawl hrang hrang lei dan chungchangte sawi tel a ni.

Meeting-ah hian Pu RL Rinawma, Principal Adviser to Chief Minister, Pu Lalrinliana Fanai, Commissioner/Secretary, H&FW Dept. bakah Health Department officials leh Planning leh Finance lama hotute an tel a ni.