Vawiin khan Lawngtlai District Development Co-ordination and Monitoring Committee (DISHA) chu an Chairman, Lok Sabha MP Pu CL Ruala hovin Lawngtlai DC Conference Hall-ah an thu khawm.
Pu CL Ruala chuan kum thar kan chuang kai a, inpekna thar nen mipui rawngbawl hna kan chhunzawm leh dawn a ni tiin, khua leh tuite tana thawk an nih hre reng turin kal khawmte chu a chah a. Tunlaiah hri tha lo eng eng emaw a tam avangin, a venna kawnga tih tak zeta hma kan lak loh chuan kan hma hun a ngaihtuahawm hle dawn a ni, a ti.
He DISHA thut khawmah hian Lawngtlai East Bialtu MLA Pu H. Zothangliana, DISHA Member Secretary Lawngtlai Bawrhsap Dr Arun T., IAS, LADC CEM Pu T. Zakunga leh CADC CEM Pu Amit Kumar Chakma te bakah, sawrkar official-te, bank leh tlawmngai pawl ai awhte an tel a. October ni 6, 2017-a DISHA thu rel bawh zui dan ngaihthlak niin, kum 2017-18 3rd Quarter (October-December) chhunga Lawngtlai District-a hmasawnna hna hrang hrang thawh dan te thlir ho a ni.
DRDA kal tlanga hna thawh Mahatma Gandhi National Rural Employment Guarantee Scheme (MGNREGS) hnuaiah April 2017-January 2018 chhungin Lawngtlai District-ah ni 47 inhlawhna siam a ni tawh a. Tunah hian Lawngtlai District pumpuiah Job Card 29170 a awm mek a. Job card-a hming chuang Aadhaar nei thei mi 57961 zinga 15492 chuan Aadhaar enrolment an ti tawh a ni. Kum 2017-18 chhunga hna thawh tur 1106 ruahman zinga 158 chu thawh zawh tawh niin, 948 chu la thawh mek a ni.
Pradhan Mantri Krishi Sinchayee Yojana (PMKSY) hnuaiah Lawngtlai District-ah Project 17 awmin, Project I & II hi March 2017 khan a tawp tawh a. Project dang 15 la kalpui mek zingah, project 13 chu sum awm loh vanga chawlh lailawk niin, project 2-ah chauh hna thawh theih a ni rih a. Pradhan Mantri Awaas Yojana-Gramin (PMAY-G) hnuaiah kum 2017-2018 chhung atana target beneficiary 1817 atangin 1st phase-ah beneficiary 729 thlan fel tawh an ni.
PHED hnuaia Swachh Bharat Mission (Gramin) hma laknaah IHHL 9542 sak turah 7057 sak zawh tawh niin, sak hmabak 2485 a la awm a. NULM hnuaia SBM (Urban) atangin Lawngtlai khawpui chhungah ek in 387 leh vantlang inthiarna 3 sak a ni a. Lawngtlai khawpui bik hi January ni 3, 2018 khan ODF-ah puan niin, Lawngtlai District pumpui hi March thla hian puan ve theih hman a nih beisei a ni.
He’ng bakah hian MzSRLM hnuaia hma lakna te, National Health Mission hnuaia Programme hrang hrang te, Social Welfare Department hnuaia National Social Assistance Programme chungchang te, DEO, RMSA leh SSA hnuaia zirna kawnga hma lakna te, P&E Department hnuaia Deendayal Upadhyaya Gram Jyoti Yojana (DDUGJY) hnuaia khaw 7 eng pekna tura ruahmanna kalpui mek leh P&E kaihhnawih scheme dang chungchang te, PHED hnuaia National Rural Drinking Water Programme (NRDWP) te thlir ho a ni a. PWD hnuaia Pradhan Mantri Gram Sadak Yojana (PMGSY) kawng 6 laih mek zinga pali chu zawh a nih tawh thu leh kawng thar 18 ruahman leh a nih thu te, online payment chungchanga bank leh internet service provider-te hma lak dan te tarlan a ni bawk.
Attachment
- Loading attachment...
