Tukin khan UD&PA Dept, Lawngtlai District leh Central YLA tang kawp huaihawtin faina beihpui intlansiak (awareness campaign on Swachh Bharat Mission - Urban marathon race) 2018 buatsaih a ni.
He marathon hi Lawngtlai khawpui chhunga chengte'n faina an ngaih pawimawh leh zual theih nana inzirtir nana buatsaih a ni a. Lawngtlai khawpui chhunga YLA branch hrang hrang atangin thalai mi 80 vel an intlansiak a. Lawngtlai atanga chhim lam km 10 Nalkawn atanga tlan tanin Lawngtlai Bazar Venga Areopagy thleng an tlan a. Lawngtlai Bawrhsap Dr Arun T., IAS bakah, sawrkar official eng emaw zat leh CYLA hruaitute chuan he marathon race-a tlante hi an tawiawm bawk.
He marathon-ah hian pakhatna chu Hmangaihzuala, College Veng niin, minit 38 chhungin a tlan thleng a. Lalmuanchhana, L-III chu pahnihna niin, pathumna chu Lalnunzawma Electric Veng a ni thung. Pakhatna hian Rs 5000/- leh certificate a dawng ang a, pahnihnain Rs 4000/- + certificate leh pathumnain Rs 3000/-+ certificate an dawng dawn a. A tlan thleng hrim hrimte hian certificate an dawng vek bawk ang. Hei bakah hian intlansiaka tel zawng zawngte chu Swachh Bharat t-shirt pek vek an ni bawk. Lawmman hi January ni 26-a India Republic Day lawmna Lawngtlai Vengpui khelmuala neih turah sem a ni ang.
