Vawiin khan Board of Management for Medical College (MIMER) chu an Chairman Mizoram Chief Minister Pu Lal Thanhawla hovin CM’s Conference Hall-ah an thukhawm a. he meeting-ah hian Health Minister Pu Lal Thanzara, Finance Minister Pu Lalsawta, Principal Adviser to CM Pu RL Rinawma, Commissioner & Secretary Health Pu Lalrinliana Fanai leh Finance Secretary Pu Lalmalsawma bakah Board Member te an tel kim hle. 

Board Meeting kaihruatu Chief Minister Pu Lal Thanhawla chuan hun rei tak atanga suangtuah tawh Mizoram-a Medical College din a tak a chang hnai thei ta chu lawmawm a tih thu a sawi a. Medical Council of India atanga MIMER hmun tur Falkawn Referral an rawn endik tur atana tih tur hmabak awm ang angte chu sorkarin a rang thei ang bera hmalaka tihpuitlin a tum thu a sawi. MCI-in tehfung atana a hman doctor leh nurse dah belh tur te, ICU leh OT hmunhma leh hmanrua tihchangtlun zawk te, mipui tana awlsam zawka Falkawn an kalna tur ngaihtuah te, damdawi ina mamawh tur kawlphetha leh tui a bik taka ngaihtuah sak te bakah internet tha zawk leh bank dah te chu theihtawpin sorkarin a bawhzui ang, a ti. 

MIMER dinna tura hmalak tawhte leh hmachhawp mekte chu State Nodal Officer (MIMER) Dr.Jane Ralte-in power presentation nen a sawifiah a. Tun dinhmunah hian MIMER Principal/Director leh Medical Superintendent tur ruat a nih tawh thu te, Medical College bultan nana Department 3 – Anatomy, Physiology leh Biochemistry – te chu hawn a nih tawh thu te, Blood Bank changtlung zawk buaipui mek a nih thu leh MIMER atana posts 629 lakna tur Cabinet-in a phalksak anga kalpui mek a nih thu te a tarlang a. Heng bakah MIMER website siam tawh a nih thu te, e-hospital programme ruahman a nih tawh thu leh Medical College hmun turah hian venhimna hna thawk tur security tha tawk neih a ngaih thu a sawi bawk. 

MIMER Management Board meeting-ah hian CMC Ludhiana te nena thawhho dan tur te, MIMER atana a bik taka Society din dan tur te leh Board Member ruat belh tur te an ngaihtuah bawk a ni.