Nimin khan Lunglei Bawrhsap Pi Lalzarmawii, IAS chuan Hnahthial leh a chheh vel tlawhin sawrkar Department hrang hrang hmalakna a en bakah Pu HC. Thanchungnunga J. lehkhabu ziak 'Mizopa In leh a chhunga thil awmte’ tih a tlangzarh nghal bawk.

Pi Lalzarmawii hi Hnahthial SDO Civil leh BDO ni bawk Pi Lalhruaitluangi leh a ho ten an lo dawng sawng a. Lehhabu tlangzarhna inkhawm Market building Hall, Hnahthiala neihah khuallian Pi Lalzarmawii chuan thu sawiin Mizo hnam ziarang leh thil neih engemawzat chungchang ziah chhuahna leh sawifiahna lehkhabu Pu HC Thanchungchungan a ziak chu ro tling a nih thu leh thangthar lo la awm leh zel turte tan lehkhabu tangkai tur tak a nih thu sawiin 'Mizopa in leh a chhunga awmte' tih lehkhabu chu a tlang zarh a ni. He lehkhabu tlangzarhna hun, Hnahthial MJA Sub Division Treasurer Pu H. Lalthanghuta kaihhruaiah hian MJA Sub Hqrs. Lunglei President Pu Lianchama Chhangte, MJA Sub Division President Pu F. Zosangliana te pawhin thu sawiin Pu C. Zonunmawian Lehkhabu thlir lawkna hun a hmang bawk a ni.

Nimina Lunglei DC Pi Lalzarmawii’n Hnahthial a tlawhna ah hian Hniahthiala Sawrkar Department hrang hrang hruaitute nen inkawmhona BDO Office Hnahthialah neih nghal a ni a, Sawrkar Department. hruaitute hian an hmalakna leh hmachhawp hrang hrang sawiin, an duh leh mamawhte an thlen nghal a ni. Hei bakah hian Hnahthial Block Sports Committee (HBSC) Ground no. 2 a Artificial turf phahna tur chu a hmunah kalin a enfiah a, he hnathawhna tur hi sum awm tawhsa niin hna tan mai theih tura ruahman a ni tawh a, chak zawka hna hi thawh a nih theihna tura hmalak dan thlir ho a ni.

Pi Lalzarmawii hian KVK Hnahthial tlawh nghalin Dr. Lalmuanzovi Sr. Scientist & Head KVK Lunglei Dist. leh a hoten an lo dawng sawng a. Office chhunga hnathawh dan kalhmang leh hmalaknate enin KVK Farm a tlawh nghala ni. Hei bakah hian Tuipui Darzokai lei, a chhuat rualrem lo leh a khaitu ban kawi avanga siamthat mek chu tlawh lehin helai a thawktute chuan Lei siamthat hna chu naktuk hian welding machine nen a ban chu siam that leh an tum tih an sawi a, reilo te ah peih an in beisei thu PWD hotute chuan an lo hrilh a ni. Helai lei hi Lunglei District chhim lam leh Lawngtlai District khaw thenkhat panna kawng ber a nih avangin a theih anga ranga siamthat a tul thu DC Pi Lalzarmawii chuan a sawi bawk. Hetih lai hian BRTF Marboat lian chu lirthei leh bungraw phurin a kai reng bawk a ni