Vaihlo leh a kaihhnawih dotu pawl Mizoram Smoke Free Group chuan vawiin khan Chief Minister Office Conference Room-ah Chairman Pu Lal Thanhawla, Chief Minister hovin meeting vawi 3-na an nei.

Chief Minister chuan Mizoramah vaihlo leh a kaihhnawihte hman loh anih theihna turin Mizoram chu Smoke Free ah puan tawh nimahse a la free lo hle a ni, a ti a. Mizo ten vaihlo hman kan uar nasat avanga kan hriselnain a tawrh nasatzia sawiin, phai lama Mizoram Houseah te damlo enkawltu tur nurse dah anih thu leh veivahna tur motor thlenga sorkarin a dah sak thu a sawilang a. Ei leh in a kan fimkhur tawk loh avang leh kan inthlahdah avanga inenkawlna senso sorkar ang pawha a tam thin zia a sawi a. Chuvangin mitin kan lo hrisel zawk theih nan tan kan lak tlan hle angai a ni, a ti.

Meeting-ah hian Health Secretary Pi Esther Lalruatkimi, MSFG member Secretary in vaihlo dona kawnga Mizoram chhunga hmalak dan hrang hrangte report a pe a. Vaihlo khuahkhirhna dan COTPA hnuaia section hrang hrang tarlante chu engtinnge chak leh zuala hmalak anih theih ang tih meetingah hian an sawiho deuh ber a ni.

Heng COTPA hnuaia vaihlo khuahkhirh dan section te tarlangin, section 4 in puipunna hmuna meizuk khap te, section 5 in vaihlo fakmawina, section 6-a in kumtlinglo hnena vaihlo zawrh, section 6-b in zirna in bul hnaia vaihlo zawrh khap leh vaihlo in hriselna a tihchhiat theih dan a lem nena tarlan te chu sawiho a ni bawk a ni.

Vaihlo hman kawngah Mizoram chu India ram state te zingah sang berin 67% a ni a; hmang tlem ber chu Goa niin 9% a ni. Global Adult Tobacco Survey in a tarlan danin zuk leh hmuam hmang hi Mizoramah mipa 72.5% an awm a, hmeichhia 61.6% an awm bawk a ni.

Meetingah hian kum 2008 October thla atanga January 2013 thleng khan meizial zuk khapna hmuna zu lui man zat mi 3708 te hnen atangin pawisa chawi zat (fine) Rs.1,17,187/- anih thu meeting-ah hian tarlangin, cigarrettes carton 7 leh packet 1590 man anih thu tarlan a ni bawk a. Kum 2011 July thla atanga 31 December 2012 thlenga sikret nghei pawh 6.96% a ni a, hei hi national average 3% aiin a tha zawk a ni. Vaihlo leh a kaihhnawih that lohna leh hlauhawmna inzirtirna lamahte, training leh workshop neih te leh vantlangah leh kohhranah hmalakna te Aizawl leh Lunglei-ah te vawi 86 leh vawi 77 neih anih thu tarlan ani bawk a ni.

Mizoram Smoke Free Groupah hian member 29 an awm a ni.