Vaihlo leh a kaihhnawih dotu pawl Mizoram Smoke Free Group chuan vawiin khan Chief Minister Office Conference Room-ah an Chairman Pu Lal Thanhawla, Chief Minister hovin meeting vawi 4-na an nei. Meeting-ah hian Ministers – Pu Lalsawta, Pu R. Romawia, Pu P. C. Lalthanliana, Pu Lal Thanzara, Pu Lalrinmawia Ralte leh Pu C. Ngunlianchunga te an tel bawk a ni.

Chief Minister chuan Mizorama zuk leh hmuam do leh tih rem na kawnga chak taka hma lak ani chungin Mizoram chu Smoke Free tak tak a la ni lo a, nimahsela tunhma ngaihtuah chuan hma kan sawn hle a, tih tur tam tak kan la nei a ni, a ti. Zuk leh hmuam hi Setan’n Mizo ringtu min thlemna lian ber ni in a lang a, a hnam anga zuk leh hmuam tam na ber state kan ni te hi Ringtu kan nihna zawn atang pawhin a zahthlak a ni, a ti bawk. Mizo ten vaihlo hman kan uar nasat avanga kan hriselnain a tawrh nasatzia sawiin mitin kan lo hrisel zawk theih nan tan kan lak tlan hle a ngai a ni, a ti.

Chairman Pu Lal Thanhawla chuan kum 20 kalta atanga mei zuk that loh zia Mizoram-a mi thahnemngai ten an lo kalpui tawh chu a tirah miten bengkhawn vak lo mah se tunah chuan mipui kan thanharh tawh thu leh mei zuk that loh zia kan hriat tlan tawh thu te a sawifiah a, hmalakna tur erawh tam tak a la awm a ni, a ti.

Meeting-ah hian Health Secretary Pi Esther Lalruatkimi, MSFG Member Secretary in vaihlo dona kawnga Mizoram chhunga hmalak dan hrang hrangte report a pe a. Vaihlo a bikin cigarette a chiah lak zat ennawn an rawt chu meeting chuan zau taka an sawiho hnuin cigarette a chhiah lak chu tihpun nise an ti a, a sanna zat tur chu erawh Taxation Department in lo ngaihtuah se an ti. Hei hi chhiah duhna rilru put vang ni lovin meizu mi ten an sim theihna kawnga nia an ngaih avangin chhiah chu tihpun nise tiin an rawt thu Health Secretary chuan a sawi.

Ram thenawm Myanmar leh Bangladesh nen insumdawn tawnnaah approved list-a tel vaihlo leh vaihlo atanga thilsiam chu approved items atanga paih nise tih an rawtna chu meeting in an sawiho hnuin Sawrkar Laipuiah ziakin thlen nise tih an rel a. Mizoram Smoke Free anih theih nan vaihlo khuahkhirhna dan COTPA hnuaia section hrang hrang chu chak leh khauh zawka kenkawh nise tih an rel bakah meeting chuan zuk leh hmuam that loh zia inzirtirna kawnga tha thlah lova, a hma aia chak leh zau zawka kalpui nise tih an rel bawk a ni.

Vaihlo hman kawngah Mizoram chu India ram state te zingah sang berin 67% a ni a; hmang tlem ber chu Goa niin 9% a ni. Global Adult Tobacco Survey in a tarlan danin zuk leh hmuam ching hi Mizoramah mipa 72.5% an awm a, hmeichhia 61.6% an awm bawk a ni.

Meeting-ah hian kum 2008 October thla atanga December 2013 thleng khan meizial zuk khapna hmuna zu lui man zat mi 4180 te hnen atangin pawisa chawi zat (fine) Rs. 1,54,6777/- anih thu tarlangin, cigarrettes carton 84 leh a hmuam chi 837 packets man anih thu tarlan a ni bawk a. Nikum February 2013 leh December 2013 inkarah khan mi 1080 in Aizawl leh Lunglei-a Tobacco Cessation Clinic an pan thu tarlan niin chung zingah za zelah 12.07 chuan cigarette an nghei tawh a, hei hi national average 3% aiin a tha zawk a ni. Vaihlo leh a kaihhnawih that lohna leh hlauhawmna inzirtirna lamah te, training leh workshop neih te leh vantlangah leh kohhran a hmalakna te Aizawl leh Lunglei-ah te vawi 28 leh vawi 43 neih anih thu tarlan a ni bawk a ni.

Mizoram Smoke Free Group-ah hian member 29 an awm a ni.