Nimin khan Justice A.M.Sapre, Chief Justice,Gauhati High Court leh Patron-in-chief,Mizoram State Legal Services Authority ni bawk hovin National Lok Adalat chungchang State Guest House Conference Hall-ah stakeholder-te'n an sawiho.

He meeting kaihruaitu Justice A.M.Sapre chuan court leh quasi-judicial body a thubuai lut leh pending tam tak tihtlem nan lok adalat chu din a nih thu a sawi a. Ukil rawih kher ngaih lohna leh sum leh hun tam tak sen pumpelhna a nih bawk avangin lok adalat hi civil thubuai leh thubuai insawirem theihna (compoundable offences) ah chuan pan zel turin a chah a. Leiba inthinnan leh ram inchuh thubuai-ah te phei chuan lok adalat chu a tangkai thei ang bera hmang turin stakeholder te chu a chah a ni. Lok adalat pan tura zirtirna pe uar tura chahin, midangte finchhuah thin turin a chah bawk a. Court thuneitu te pawh compoundable case an court a lokal te chu lok adalata thlen thin tur in a chah bawk.

National Lok Adalat hi National Legal Services Authority hmalakna hnuaiah 12th April, 2014 hian Judiciary peng hrang hrang; Supreme Court, High Court leh District Court a neih tur a ni.

Lok Adalat hi Court thlen kher ngailova thubuai sawiremna hmun niin, court pawna sawirem theih loh thubuai (non-compoundable offences) tih lohah chuan pan theih vek a ni a. Lok adalatah hian pawisa chawi a ngai lova, sawirem puitu tur a ruat ten thubuai thlente sawirem dan an lo ngaituah pui thin a ni.

Meeting-ah hian stakeholder-te'n an hriatchian duhte zawtin hun an hmang a. Meeting kaihruaitu Chief Justice hi Justice Ujal Bhuyan, GHC Mizoram Bench, M.K.Bhattacharjee, Registrar General,GHC leh Registrar cum Principal Secy to Chief Justice M.K.Kalita ten an tawiawm a ni.