Ministry of Youth Affairs & Sports hnuaia thlalaite hmakhua ngaihtuah pawl pawimawh tak ‘Nehru Yuva Kendra’ bultumin vawiin khan YMA Sub-Hqrs. Conference Hall, Lunglei-ah ‘Youth Convention 2014’ buatsaih a ni a. He thalai inkawmpuiah hian Lunglei Addl. DC Dr.Andrew H.Vanlaldika chu Khuallian niin, NYK Youth Coordinator Lunglei Pu Raj Kumar Joshi pawh a tel a ni.

Khuallian Dr. Andrew H.Vanlaldika chuan he Youth Convention chhim tura thalai 100 chuang kalte chu nasa taka fuihin Nehru Yuva Kendra (NYK) kaltlanga thalaite tan hamthatna tam tak ruahmante chu haichhuaka hmang tangkai thiam turin a hrilh a ni. Mizo thalaite zingah lar em em internet leh social media-te chu hmang thiam lote tan chuan an hun tha paihralna a nih rual rualin, a hmang tangkai thiam chuan hlawhtlinnan an hmang thung thin a ni, a ti a. NYK hian thalaite tan an taksa, rilru leh eizawnna lamhawi bakah hnam inunauna lam a zirtirin programme hrang hrang a kalpui mek a, chuvangin Mizoram thalaite chu NYK Youth Club-ah te a hma aia tel tam zawk turin leh mahni hmasawn nan hmang thiam turin a fuih bawk. Khawvelah hnam leh hnamtawng te humhalh leh vawn nun zel an uar laia Mizo thalaiten Mizo tawng dik mang lova an ziak leh sawi thin chuan hnam tan a pawi thei em tih ngaihtuah thar turin a chah a; India khua leh tui kan nih angin Hindi tawng pawh uar sauh sauh a pawimawh thu a sawi bawk a ni. Khuallian hian Youth Club-te hnenah Award leh Sport Materials hrang hrang hlanna a nei nghal a ni.

NYK Coordinator Lunglei Pu Raj Kumar Joshi pawhin an hmalakna leh programme hrang hrangte a sawizau a, thalaite tan training buatsaih a nih tur thu leh Lunglei-a NYK Youth Club pawh tihchangtlun chho zel tum a nih thu a sawi a ni.