Vawiin chawhnu khan Mizoram State Biodiversity Board chu an Chairman, Chief Minister Pu Lal Thanhawla hovin CM Cabinet Meeting Room-ah International Day for Biodiversity 2018 hman dan tur leh Mizoram Biodiversity humhalh kawnga thil pawimawhte ngaihtuahin an thukhawm.

Chief Minister chuan sawihawnna neiin, Biodiversity lam ngaihven leh tui tak tak mipui zinga an awm thar zel chu lawmawm a tih thu a sawi a. Mizoram chu Biodiversity hotspot niin, heng hausaknate hi hun rei tak hriatchian leh hriatthiam loh avanga ngaihthah a lo hlawh tawh hnu in harh thar a, humhalh tura mimal leh pawl anga penchhuak an awm zel chu lawmawm a tih thu a sawi. Chief Minister chuan Biodiversity chuan thing leh mau leh nungcha mai piah lamah buh leh bal, thei leh thlai leh ran vulh thlenga a huam tel thu sawiin, chung avang chuan biodiversity hausakna humhalh leh, a daihrei thei ang ber a hman tangkai dan ngaihtuah chu ram hmasawnna in a ken tel tur a ni, a ti a. Sawrkar laipui pawhin a ngaihpawimawh thu tarlangin, hmasawn tur chuan awareness, inhrilhhriatna neih tam leh tanrual a ngaih thu sawiin, kumin International Day for Biodiversity chu tangkai thei ang bera hman a nih theih nan member-te chu ngaihtuahna seng turin a sawm a ni.

UN General Assembly-in kum tin May ni 22-a hma tur a lo tih tawh angin Mizoramah pawh hman leh a ni dawn a. Vawiin meeting-ah hian he ni hman dan tur chungchang sawiho niin, hemi ni pual hian School, College leh University zirlai tan ‘Biodiversity Run’ buatsaih te, Photography leh Poster Making Competition leh TV-a Live Discussion neih te rel a ni. Kumin International Day for Biodiversity thupui tur chu “Celebrating 25 Years of Action for Biodiversity” a ni.

Heng bakah hian vawiin State Biodiversity Board member thukhawm chuan Mizoram tualto hnim leh thlai, leh nungcha hrang hrang humhalh kawnga pawnlam atanga lo lut, Mizoram chhung a mi rawn luahlan thei "Invasive Alien Species" an tih ho khuahkhirh tura hma lak dan tur te sawi tel a ni a. Sik leh sa inthlakin Biodiversity a nghawng dan zirchian chunghcang sawi ni bawkin, chumi atan chuan mawhphurtu Department hrang hrangin Research Cell an neih te hmang tangkaiin zirchianna lo nei se tia rel a ni.

National Biodiversity Authority chuan khaw tinah Biodiversity Management Committee (BMC) siam turin state tin te a beisei a. He committee hian an khua leh a chhehvela thing leh mau leh nungcha awm dan leh awm tharte an chhinchhiah ang a, chung chu hmalak zelna atan inbehchhanna tur database tha tak a ni dawn a ni. Heng committee-te hnathawh senso atan National Biodiversity Authority chuan kum khat atan cheng sing ruk theuh a pe thin a. Kumin 2017-2018 atan Mizorama BMC Block 34 tan pawisa release a tawh a ni.