Vawiin khan sawrkar laipui ruahman angin, India ram hmun dangte rualin Lawngtlai District-a Block hrang hrang pali-ah Kisan Kalyan Karyashala (Farmers Welfare Workshop) buatsaih a ni a. Lawngtlai Block-ah chuan Chawntlangpuiah hun hmangin, block dangah chuan an hmunpui theuh - Bungtlang, Sangau leh Chawngte-ah te hun hman a ni.

Chawntlangpuia hun hman chu District Fisheries Development Officer Pu LH Zirliansanga'n a kaihruai a. Khuallian, LADC Chairman Pu V. Zirsanga chuan kut hna thawktu kal khawmte chu a thlawna dawn ringawt em lo va, thawh rimna lawmman dawngtu nih tum turin a chah a. Thawh rimna tel lo hlawkna chuan rei a daih lo tih sawiin, tuna kan ram neih laiah hian thawh rimna chi kan tuh loh chuan a thawk rimte kutah kan ram hi a la lut dawn a ni, a ti a. Hlawhtling turin mahni zawh tur kawng thlan fel a, taima taka zawh tauh tauh a ngai a ni, a ti.

Kisan Kalyan Karyashala hi sawrkar laipui ruahmanna "Doubling of Farmers' income by 2022" (Kum 2022 hmaa kut hna thawktute lak luh a leta tihpun) tihhlawhtlinna atana buatsaih a ni a. ATMA Lawngtlai District bul tuma he'ng hun hmannaah hian kut hna thawktute chu koh khawm niin, an thar chhuah leh an lak luhte a leta a lo pun theih nana hma lak dan tur hrang hrang hrilhfiah leh zirtir an ni a. Line department hrang hrang - Agriculture, AH & Vety, Fisheries, Horticulture, Sericulture leh Soil WC&R Department atangte'n thu sawi ngaihthlak niin, KVK chuan a thlawna ran entirna (animal free clinic) an buatsaih bakah, kut hna thawktute harsatna tawh leh a chin fel dan tur sawi hona hun hman a ni bawk.

He hunah hian kut hna thawh peng hrang hranga hma la tha lawmman (outstanding farmer's award) sem nghal a ni a. Lawngtlai block huam chhunga lawmman dawngtute chu a hnuaia mite hi an ni.

1) Ngurliansangi, Thingkah - Sericulture

2) Lalfakawma, Rulkual - Sericulture

3) Buangthangi, Thingkah - Sericulture

4) J. Lalramliani, Lawngtlai Chandmary - AH & Vety

5) J. Nguntlunga, Lawngtlai-III - AH & Vety

6) H. Lalramnghaka, Sihtlangpui - Soil

7) Neihkima, Lawngtlai Vengpui - Soil

8) Lalbiakdika, Chawntlangpui - Horticulture 

9) Parleni, Lawngtlai Council Veng - Agriculture

10) C. Thangvunga, Lawngtlai Vengpui - Fisheries