Mizorama a hmasa ber ni turin Lunglei Zohnuaiah Digital Planetarium siam a ni dawna Planetarium siamna hmun tur leh a panna kawng siamthat dan tur tukin khan Mizoram Youth Commission Chairman Pu Joseph Lalhimpuia MLA in a tlawh.

Pu Joseph Lalhimpuia hi Scientific Officer Pu F.Ramchuansanga leh E.E PWD Road  Pu Samuel Ramdinthara ten an tawiawma, Zohnuai khawtlang hruaitu ten an lo dawngsawng.

Pu Joseph Lalhimpuia chuan NEC sum cheng nuai 314 hmangin Digital Planetarium hi siam tum a nih thu leh First Installment pawh hmuh tawh a nih thu a sawi a, hei bakah hian Planetarium bula Science Centre sak nan NEDP atangin cheng nuai 700 dah a nih thu a sawi bawk. Zohnuai ah Mizorama a hmasa ber tur Planetarium a awm tur chu Zohnuai khawtlang a lawmpui thu Pu Joseph Lalhimpuia  chuan sawiin, a hlawhtlin theihna tura a panna kawng zauhna atana mi inphal ten an ram a thlawna an pek bakah Mizo Upa Pawl ten an Building thiah an phal chu chhuanawm a tih thu a sawi. Planetarium sak a nih theihna tura nasa taka hmalatu Finance Minister Pu Lalsawta leh bialtu MLA Pu P.C Lalthanliana te chungah Pu Joseph Lalhimpuia  chuan lawmthu sawi bawkin Planetarium a awm theihna tur hian Lunglei HPC Vice. Chairman hna a chelh ve lai atanga theihtawp a lo chhuah ve tawh thu sawiin ataka a hlawhtlinna hmuh mek a ni ta chu lawmawm a tih thu a sawi bawk. Planetarium chu peih a nih hunah thalaite tan finvar na leh hmasawnna nasa tak a thlen ngei a rin thu sawi bawkin thalaite hmasawnna tura MYC in hma a lakna kawng hrang hrangah Planetarium pawh hi thalai te tan thil vanneih thlak tak a ni ngei ang a ti.

Planetarium sakna hmun tur leh a panna kawng tihzau dan turte khawtlang hruaitute leh Official te nen an en ho nghal a ni.