Vawiin khan Chief Minister Pu Lal Thanhawla hovin Mizoram State Planning Board chu Planning Department Conference Hall ah an thukhawm a, Sawrkar policy thar New Economic Development Policy (NEDP) chungchang an sawiho a, State Planning Board Member-te leh Special Invitee ten NEDP hnuaia sawrkar kum kal mekah sum hmanna lailawk duan ah sector hrang hranga sum ruahman chungchanga an ngaihdan leh rawtna te zau takin an sawi a. Meeting ah hian Home Minister Pu R. Lalzirliana, Finance Minister Pu Lalsawta, Vice Chairman, Mizoram State Planning Board Pu H. Liansailova leh Planning Board Member-te leh Special Invitee te an tel a ni.

Chief Minister leh Chairman, Mizoram State Planning Board ni bawk Pu Lal Thanhawla chuan NEDP chungchang sawihawnna neiin Sawrkar Laipuiin state te tana sum a ruahman leh a pek dan a thlak danglam dante sawiin Five Year Plan titawpin Fifteen Year Plan duan tumna a awm mek a, Sawrkar kum kal dan pawh thlak tumna te a awm mekah hriat a ni a, Rampum ang leh State-te chu an mahni puala Vision 2030 siam turah tih a ni. Tunah maia chuan Kum 2017-18 atanga 2023-24 atana Seven Year Plan duan turah tih kan ni a, he Plan hi a laihawl vel, kum thum a tawpna 2020 ah ennawn turah tih a ni a. Hengte hi kan buatsaih mek a ni, a ti a. Vawiin meeting hian heng thil leh NEDP hi engtin nge kan khaikhawm thei ang tih ngaituahna neiin leh NEDP kalphung tur duan leh sectoral draft allocation-a ruahmanna siam te chungchanga Planning Board Member-te ngaihdan leh rawtna te zau taka ngaithla leh sawiho tura meeting hi koh a nih thusawiin Member te chu an ngaihdan leh an rawtna te sawiin turin a sawm a ni.

Finance Minister Pu Lalsawta leh Vice Chairman State Planning Board Pu H. Liansailova te pawhin thu tawi sawiin NEDP danglam bik na te, a huamzau dante sawiin NEDP chu NLUP hrinchhuah a nih dante an sawi lang a. Kawng hranga hranga NEDP kaltlanga hmasawnna a awm thei dante an sawi bawk a ni.

Hemi hnu hian Planning Secretary Dr. C. Vanlalramsanga chuan nimin piaha NEDP Core Committee thukhawm in kum 2016-17 chhunga draft sectoral allocation Plan siam a pawm leh Policy Reforms Agenda hlawm lian paruk pawm leh rawtna an lo siam tawh chu tarlangin heng ruahmanna te hi chhipchhiar takin an thlirho a. Hemi chungchang hi Planning Board Member leh Special Invitee ten zau taka sawihoin an ngaidan an rawtna leh tan lakna tur niawma an hriatte chu an tarlanga. Member te hian kawng hrang hrangin Mizoramah hmasawnna a thlen thu te leh hmabak erawh a la awm thute sawiin langin mipuite rilru sutthlek siamthat leh chawikan a pawimawh thu an sawi lang a. NEDP in Mizoramah chak leh zawka hmasawnna hrang hrang a thlen an beisei thu mipui pawhin kawng tin renga an hlawkpui ngei an beisei thu te chu Member te hian an sawi bawk a ni.

Tarlan tawh thin angin NEDP hian ram hmasawnna atana hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui anih theih nan a ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nan a hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te, hlawk leh inrenchem zawka kalpui anih theihnan a ruahmanna siam te hi a huam vek a. Hetiang taka huam zau leh economy a nghawng (impact) nei lian tur anih avang hian NEDP hi Comprehensive Growth Strategy tih a ni.