Nimin khan Chief Minister Pu Lal Thanhawla kaihhruaina hnuaiah Chief Minister Pisaah New Economic Development Policy (NEDP) Core Committee hmasaber chu an thukhawm a, NEDP hnuaia kum 2016-17 chhunga sector hrang hranga sum ruahman leh hmanna tur duan lawkna Draft sectoral component wise allocation leh hemi hun chhunga Public Policy Reforms Agenda hlawm 6 chhawpchhuah te chu chipchhiar leh zau taka sawiho a ni.
NEDP Core Committee meeting ah hian Agriculture Minister Pu R. Lalzirliana; Finance Minister Pu Lalsawta; Industries & Commerce Minister Pu H. Rohluna; UD&PA Minister Pu Zodintluanga; Horticulture Minister Pu P.C. Lalthanliana; Mizoram State Planning Board Vice Chairman Pu H. Liansailova; Chief Secretary Pu Lalmalsawma; Principal Secretary to Chief Minister Pu Lal Ramthanga; Planning Secretary Dr. C. Vanlalramsanga leh Planning Department hotu dangte an tel a ni.
Chief Minister Pu Lal Thanhawla chuan NEDP chu NLUP hrinchhuah anih thu sawiin he policy hian mithiamte fak a hlawh chho hle a, mipui te pawhin beiseina sang tak nen a thlir mek a ni a ti a. NLUP atanga hlawhtlinna hrang hrang hmu ten nasa zawka hmasawnna atana ke an pen theihna hmanrua a nih dawn thu sawiin NEDP hian Mizoram chu subsistence economy atanga market economy a hruailuh a tum a ni a ti.
Planning Minister Pu Lalsawta leh Planning Secretary Dr. C. Vanlalramsanga ten NEDP draft sectoral allocation chungchang sawi hawnna an neih hnuin Core Committee Member, Minister rual te hian sectoral allocation lo duan lailawk sa (draft) sawi zauna neiin hmalakna tur an ngaihpawimawh zual thenkhate an sawi lang a. NEDP kalpui dan tur atana capacity building programme ruahman anih theihna tur te, Key growth drivers atana projects leh schemes tur te, infrastructure development atana projects tur te, leh reforms agenda hrang hrang te zau takin an sawi ho a ni.
Kum 2016-17 atana Sector hrang hranga key growth drivers projects leh schemes ruahman tur zingah Agriculture/Horticulture link road pawimawh ruahman te, Agriculture leh Horticulture hnuaia thlai/thei kum khata thar chhuah theih domestic market a mamawh zual phuhru tur leh high value thei thar chhuah tur ruahman te, kuthnathawktu ten an tharchuah an hralhna tur market yards siam te, rice mill din te, handloom export promotion facility ruahman te, industry lama skills development centre ruahman te, entrepreneurship development scheme ruahman te, start up business support pek theihna tur programme ruahman te, improvement of infrastructure in villages te, improvement of infrastructure in city and towns te, District Hospital thuam that leh khawl pawimawh zual dah te, higher secondary school leh models school atana additional class rooms ruahman te, tourists facilitation tha zawk a kalpui dan tur te, ease of doing business atana hmalakna tur hrang hrang te, MLA constituency hnufual bikah inkalpawhna kawng thuamthat chungchangte zau taka sawiho anih hnuah bawhzui zel tura pawm a ni a.
Meeting ah hian Mizoram thlai leh thil tharchhuah tam zawka value addition siam chu tha an tih thu sawiin hetiang lamah tui leh hma la mek mimal leh pawl te chu thawhpui dan kawng dap nise an ti a. Thalai te thiamna tihpun leh hna zawnna kawnga skill development leh thalai ten sumdawnna lam an hawi thei nan entrepreneurship development programme te chu ngaihpawimawh bik nise tiin meeting chuan zau takin an sawiho a ni.
NEDP Core Committee chuan NLUP chak taka kalpui zel dan tur leh NEDP nen a convergence agenda zau takin an sawiho a. A dawngtu te tana awlsam leh tangkai thei ang ber tur zawnga kalpuiin NLUP chak taka kalpui dan tur ruahmanna an siam nghal bawk.
Kum 2016-17 chhunga NEDP special projects atan mipui mamawh hrang hrang phuhru thei ang ber turin Chief Minister Rural Housing Scheme te, Referral Hospital tihchangtlun te, Aizawl City Road Junctions Improvement te, Development of new secretariat complex te, strengthening of legal metrology te, drugs and foods safety atana ruahmanna tihchak te ruahman turin pawm a ni bawk.
Kum 2016-2017 atana Public Policy Reforms Agenda paruk chhawpchhuah te chu sawiho a ni leh a. Heng zingah hian NEDP High Level Meeting June ni 2, 2016 a thukhawm in hnathawh chak theih nana hmanraw pawimawh Administrative Reforms Committee din a lo remtih tawh chu meeting chuan Chief Secretary kaihhruaina hnuaia Member 2 dang awmin din a rel a, he Committee hian thla 3 chhungin an report an pe dawn a ni. Sawrkar sum dinhmun siam thatna leh dik leh fel zawka enkawl dan tur ruahmanna leh hmalakna tur Public Financial Management Reform Agenda chu Core Committee in Approach Paper siam nise tih a ni a. Ram inpek, enkawl leh hman dan Land Holding/Land Use Pattern zirchianga ruahmanna tha zawk atana rawtna siam turin Chief Secretary kaihhruiana hnuaia Committee din nise tih rel a ni bawk a. Skill Development Policy chungchang chu zau taka sawiho anih hnuah hun remchang hmasa berah a bik taka ngaihtuah that leh nise tiin meeting hian a rel bawk. Sik leh sa inthlak danglam chungchanga ruahmanna Climate Change Mitigation Policy chu Envionment, Forest and Climate change Department in action plan mumal tak rawn duang sela tiin meeting hian a rel e. Directorate of Economics and Statistics in NEDP in a mandate anga Strengthening of Official Data and Statistics chungchanga hma a lak mek dan leh BPL Survey kalpui mek thu ngaithlak leh sawiho a ni bawk.
NEDP Core Committee bakah hian NEDP Executive Committee, Chief Secretary Chairman-na hnuaiah leh Monitoring and Evaluation Committee, Vice Chairman, Mizoram State Planning Board, Chairman-na hnuiah hian din fel tawh a ni a. Kum 2016-17 atan NEDP hnuaiah cheng nuaih 27000 ruahman a ni.
