Nimin khan Chief Minister Pu Lal Thanhawla chu a Pisaah Council for Scientific & Industrial Research (CSIR) hnuaia Durgapur West Bengal a hmunpui nei Central Mechnical Engineering Research Institute (CMERI) a Director Professor Harish Hirani leh a thawhpui scientist pathum ten an hmu.

Mizorama CDAR nen a an thawhho dan chungchangte sawiin Mizoram hmun dangah pawh CDAR ah sawthing khawl leh aieng sawngbawlna atan an bun angte bun belh an duh thu an hrilh a, CDAR ang pawl dang thawhpui tur zawnsak turin Chief Minister hi an ngen a. CMERI scientist te hian an khawl siamte hi a bika an ngaihtuah chhuah leh an siam anih thusawiin heng khawl hi kuthnathawktu te tan a tangkaipui hle a , value addition siamna kawngah nasa takin a pui thu an sawi bawk.

CMERI Director hian tung atanga biodiesel dehchhuahna atan zirbingna an kalpui mek thu leh damdawi in bawlhhlawh sawngbawlna atana hospital waste management system ruahmanna an siam mek thu te an hrilh a. Chief Minister chuan heng thil te hi chak taka hma lak anih theih nan proposal lo duang turin a hrilh a, an proposal te chu lo ensak a tiam a ni.